रत्नागिरी : मिरकरवाडा जेटीवरून समुद्रात मासेमारीसाठी निघालेल्या नौकेवरून पाय घसरून समुद्रात पडल्याने एका २१ वर्षीय नेपाळी खलाशाचा पाण्यात बुडून दुर्दैवी मृत्यू झाल्याची घटना घडली आहे. अश्विन रामचंद्र ड. थारू (वय २१, रा. मु.पो. जानकी, जि. कैलाली, नेपाळ; सध्या रा. मिरकरवाडा जेटी, ता. जि. रत्नागिरी) असे मृत खलाशाचे नाव आहे.
मिळालेल्या माहितीनुसार, मिरकरवाडा जेटीवरून सहिल उमर मुकादम यांच्या मालकीची ‘अल-उमर-२’ (नोंदणी क्र. ind-mh-4-mh-११६३) ही नौका अन्य खलाशांसह मासेमारीसाठी समुद्रात निघाली होती. या बोटीवर अश्विन थारू हा देखील कामावर होता. बोट समुद्रात जात असताना अश्विन हा लघुशंकेसाठी नौकेच्या कडेला गेला असता त्याचा अचानक पाय घसरला आणि तो खोल समुद्राच्या पाण्यात पडला. हा प्रकार लक्षात येताच नौकेवरील खलाशी विमल छोटेलाल थारू व सहकाऱ्यांनी तात्काळ समुद्रात त्याचा शोध घेण्यास सुरुवात केली; मात्र तो मिळून आला नाही. अखेर शेजारील ‘शेनकई धारेवारे’ या बोटीच्या मदतीने शोधमोहीम राबवली असता अश्विन हा समुद्राच्या पाण्यात निपचित पडलेल्या अवस्थेत आढळून आला. खलाशांनी त्याला तातडीने बोटीवर घेऊन मिरकरवाडा जेटीवर आणले व पुढील उपचारांसाठी रत्नागिरी येथील जिल्हा शासकीय रुग्णालयात (सिव्हिल हॉस्पिटल) दाखल केले. मात्र, रुग्णालयातील वैद्यकीय अधिकाऱ्यांनी तपासणी करून त्याला उपचारापूर्वीच मृत घोषित केले. या घटनेची नोंद रत्नागिरी शहर पोलीस ठाण्यात भारतीय नागरिक सुरक्षा संहिता (BNSS) कलम १९४ अन्वये आकस्मिक मृत्यू क्रमांक १२८/२०२६ अशी करण्यात आली असून, रत्नागिरी शहर पोलीस या प्रकरणाचा अधिक तपास करत आहेत.
