रत्नागिरीत आकाशप्रेमींनी अनुभवला अद्भुत खगोलीय सोहळा; चंद्रामागे लपला तेजस्वी शुक्र

रत्नागिरी: श्री गणेश चतुर्थीच्या दिवशी रत्नागिरीच्या आकाशात आकाशप्रेमींसाठी अविस्मरणीय असा खगोलीय सोहळा अनुभवायला मिळाला. चंद्राने तेजस्वी शुक्र ग्रहाला काही काळ आपल्या मागे झाकून टाकण्याची दुर्मिळ घटना म्हणजेच चंद्राकडून शुक्राचे पिधान (Lunar Occultation) सोमवारी सायंकाळी पाहायला मिळाले. या विलोभनीय घटनेने स्थानिक खगोलप्रेमी आणि नागरिकांचे लक्ष वेधून घेतले.

सोमवारी सायंकाळी सुमारे ४.४५ वाजण्याच्या सुमारास शुक्र चंद्राच्या अत्यंत जवळ असल्याचे दिसून आले. त्यानंतर सुमारे ५ वाजता शुक्र चंद्राच्या अप्रकाशित भागामागे गेल्याने काही काळ तो दृष्टीआड झाला. सुमारे ६.१५ वाजण्याच्या सुमारास चंद्राच्या प्रकाशित भागाच्या पलीकडून शुक्र पुन्हा दिसू लागला. चंद्र आणि शुक्राच्या या लपंडावाचे दृश्य आकाशप्रेमींसाठी विशेष आकर्षण ठरले.

विशेष म्हणजे, या काळात शुक्र पृथ्वीच्या तुलनेने जवळ असल्याने तो अत्यंत तेजस्वी दिसत होता. शुक्राचा केवळ सुमारे २९ टक्के भाग प्रकाशित असला, तरी त्याची तेजस्विता मोठी असल्यामुळे निळ्या आकाशाच्या पार्श्वभूमीवरही तो चमकता बिंदू म्हणून ओळखता येत होता. त्यामुळे दिवसाच्या उत्तरार्धात घडलेली ही खगोलीय घटना पाहण्यासाठी दुर्बिणी तसेच कॅमेऱ्यांच्या माध्यमातून आकाशप्रेमींनी निरीक्षण केले.

चंद्राच्या कोरीसोबत तेजस्वी शुक्राची झालेली ही अनोखी भेट आणि त्यानंतर चंद्रामागे शुक्र लपण्याचा क्षण हा आकाशप्रेमींसाठी विशेष अनुभव ठरला. अनेकांनी या खगोलीय सोहळ्याचे छायाचित्रण करत हा अविस्मरणीय क्षण कॅमेऱ्यात कैद केला. गणेशोत्सवाच्या उत्साहात रत्नागिरीच्या आकाशात घडलेल्या या अद्भुत खगोलीय घटनेने नागरिकांच्या कुतूहलातही भर पडली.