लांजा येथे गांजासदृश्य अंमली पदार्थाचे सेवन; ३५ वर्षीय तरुणावर गुन्हा

लांजा : मुंबई-गोवा महामार्गालगत देवधे शेती शाळेसमोरील जंगलमय भागात गांजासदृश्य अंमली पदार्थाचे सेवन केल्याप्रकरणी लांजा पोलिसांनी ३५ वर्षीय तरुणाविरुद्ध गुन्हा दाखल केला आहे. ऋषीजीत यशवंत कांबळे (वय ३५, रा. देवधे बौद्धवाडी, ता. लांजा, जि. रत्नागिरी) असे गुन्हा दाखल करण्यात आलेल्या संशयिताचे नाव आहे.

पोलिसांनी दिलेल्या माहितीनुसार, १५ सप्टेंबर रोजी रात्री सुमारे ८.०५ वाजण्याच्या सुमारास मुंबई-गोवा महामार्गावर देवधे शेती शाळेसमोरील जंगलमय परिसरात झाडी-झुडपांच्या आडोशाला कांबळे हा गांजासदृश अंमली पदार्थाचे सेवन करताना आढळून आला. यावेळी पोलिसांनी त्याच्यावर कारवाई केली.

या प्रकरणी पोलीस शिपाई स्वप्नील अविनाश कदम (वय ३५, नेमणूक लांजा पोलीस ठाणे) यांनी फिर्याद दिली. त्यानुसार लांजा पोलीस ठाण्यात गुन्हा रजिस्टर क्रमांक २४२/२०२६ अन्वये एन.डी.पी.एस. कायदा १९८५ मधील कलम ८(क) व २७ अंतर्गत गुन्हा दाखल करण्यात आला आहे. गुन्हा १५ सप्टेंबर रोजी रात्री ११.०८ वाजता दाखल करण्यात आला असून, या प्रकरणाचा पुढील तपास लांजा पोलीस करीत आहेत.