मुंबई : महावितरणच्या विद्युत वाहिन्या किंवा इतर उपकरणांमुळे घडणाऱ्या अपघातांमध्ये दुभती, कामकरी अथवा लहान जनावरे दगावल्यास दिल्या जाणाऱ्या आर्थिक मदतीत महावितरण प्रशासनाने मोठी वाढ करण्याचा महत्त्वपूर्ण निर्णय घेतला आहे. यासंदर्भातील अधिकृत प्रशासकीय परिपत्रक महावितरणचे मुख्य महाव्यवस्थापक भूषण कुलकर्णी यांच्या स्वाक्षरीने जारी करण्यात आले असून, हे सुधारित नुकसानभरपाईचे दर तातडीने प्रभावात आले आहेत. वाढत्या महागाईच्या काळात शेतकरी आणि पशुपालकांचे होणारे नुकसान लक्षात घेऊन घेण्यात आलेल्या या निर्णयामुळे ग्रामीण भागाला मोठा आर्थिक आधार मिळणार आहे.
महावितरणच्या यंत्रणेमुळे होणाऱ्या प्राणांतिक व अप्राणांतिक अपघातांच्या प्रसंगी तातडीची भरपाई देण्यासाठी २००८ आणि २०११ मध्ये मार्गदर्शक सूचना निश्चित करण्यात आल्या होत्या. मात्र, सद्यस्थितीत जनावरांच्या वाढलेल्या किमती आणि शेतकऱ्यांचे होणारे अपरिमित नुकसान पाहता या भरपाईच्या रकमेत सुधारणा करण्याचा प्रस्ताव प्रशासनाच्या विचाराधीन होता. सक्षम अधिकाऱ्यांच्या मंजुरीनंतर आता नव्या नियमानुसार गाय, म्हैस, बैल, घोडा किंवा गाढव यांसारख्या मोठ्या, दुभत्या व कामकरी जनावरांचा विद्युत अपघातात मृत्यू झाल्यास थेट ५० हजार रुपयांची आर्थिक मदत दिली जाणार आहे. याव्यतिरिक्त शेळी, मेंढी तसेच वासरू यांसारख्या लहान जनावरांचा अपघाती मृत्यू ओढवल्यास ५ हजार रुपये नुकसानभरपाई देण्याचे निश्चित करण्यात आले आहे.
दरम्यान, दुर्घटनेनंतर आर्थिक मदतीचे प्रस्ताव तयार करणे, मदत वाटपाची उर्वरित कार्यपद्धती आणि पूर्वीच्या परिपत्रकातील इतर सर्व नियम पूर्ववत अबाधित राहतील, असेही महावितरणमार्फत स्पष्ट करण्यात आले आहे. विद्युत अपघातात अचानक मुक्या जनावरांचा जीव गेल्यानंतर उद्ध्वस्त होणाऱ्या पशुपालकांना नव्या वाढीव भरपाईमुळे तात्काळ दिलासा मिळण्याचा मार्ग मोकळा झाला आहे.
