रत्नागिरी : जिल्ह्यात हवामानावर आधारित फळपीक विमा योजनेअंतर्गत प्रलंबित राहिलेल्या सुमारे ९ हजार १३ बागायतदारांच्या बँक खात्यात अखेर ३० कोटी १९ लाख ४६ हजार ३०६ रुपयांची परतावा रक्कम जमा करण्यात आली आहे. अवकाळी पाऊस, गारपीट तसेच तापमानातील टोकाच्या बदलांमुळे आंबा आणि काजू पिकांचे उत्पादन अवघ्या १५ ते २० टक्क्यांवर घसरल्याचा अहवाल कृषी विद्यापीठ व कृषी विभागाने दिला होता. त्या पार्श्वभूमीवर जिल्ह्यातील ३७ हजार ४२० बागायतदारांनी १८ हजार ५२८.१ हेक्टर क्षेत्राचा विमा उतरवला होता. यापूर्वी जुलै महिन्यात २५ हजार ७८० बागायतदारांना ८८ कोटी ४ लाख ३८ हजार ३०६ रुपयांचा परतावा थेट देण्यात आला होता; मात्र मंडणगड, खेड, राजापूर आणि रत्नागिरी या चार तालुक्यांतील नऊ हजारहून अधिक शेतकरी तांत्रिक कारणांमुळे लाभापासून वंचित राहिले होते.
वंचित राहिलेल्या शेतकऱ्यांसाठी कृषी विभाग आणि बागायतदारांनी विमा कंपनीकडे सातत्याने केलेल्या पाठपुराव्याला अखेर यश आले असून, तब्बल तीन महिन्यांच्या प्रतीक्षेनंतर ही थकीत भरपाई वर्ग करण्यात आली आहे. यंदा जिल्ह्यात फळपीक विम्यातून एकूण ११८ कोटी २२ लाख ८४ हजार रुपयांचा विक्रमी परतावा वितरित झाला असून, गतवर्षीच्या (सन २०२४-२५) १०६ कोटी ११ लाख रुपयांच्या तुलनेत यंदा १२ कोटी ११ लाख रुपयांची अधिक रक्कम शेतकऱ्यांच्या पदरात पडली आहे. ऐन सणासुदीच्या तोंडावर थेट खात्यात वर्ग झालेल्या या आर्थिक मदतीमुळे जिल्ह्यातील बागायतदारांना मोठे आर्थिक बळ मिळाले असून शेतकरी वर्गातून समाधान व्यक्त होत आहे.
