रश्मिका मंदानाचा रौद्र अवतार; ‘मैसा’चा थरारक टीझर प्रदर्शित

मुंबई: आतापर्यंत रोमँटिक आणि ग्लॅमरस भूमिकांमधून प्रेक्षकांच्या भेटीला आलेली अभिनेत्री रश्मिका मंदाना आता एका दमदार ॲक्शन अवतारात दिसणार आहे. तिच्या आगामी ‘मैसा’ या चित्रपटाचा थरारक टीझर नुकताच प्रदर्शित झाला असून, त्यात रश्मिकाचा रौद्र आणि आक्रमक अंदाज पाहायला मिळत आहे.

हातात कोयता, अंगावर काटा आणणारे प्रसंग आणि पाण्याखालील ॲक्शन दृश्यांमुळे ‘मैसा’च्या टीझरने चित्रपटाबाबतची उत्सुकता वाढवली आहे.

‘मैसा’ या चित्रपटातून रश्मिका पहिल्यांदाच दमदार ॲक्शन भूमिकेत दिसणार आहे. चित्रपटाच्या पोस्टर आणि याआधी प्रदर्शित करण्यात आलेल्या काही दृश्यांमुळे तिच्या व्यक्तिरेखेबद्दल उत्सुकता निर्माण झाली होती. आता टीझरमध्ये तिचे वेगळे रूप समोर आले आहे. टीझरची सुरुवात रश्मिकाच्या आवाजाने होते. ती म्हणते, “मी थकलेय, मी थांबलेय, मी हरलेय.” त्यानंतर टीझर थेट ॲक्शनच्या दिशेने जातो. कठीण परिस्थितीत अडकलेली तिची व्यक्तिरेखा आजूबाजूच्या लोकांशी संघर्ष करताना दिसते.

रवींद्र पुल्ले यांनी ‘मैसा’च्या माध्यमातून दिग्दर्शन क्षेत्रात पदार्पण केले आहे. हा पॅन इंडिया चित्रपट असून, रश्मिकाच्या व्यक्तिरेखेभोवतीच त्याची कथा फिरताना दिसते. चित्रपटात वडील आणि मुलीच्या नात्याचा भावनिक धागा असून, त्यासोबतच थरारक आणि हाय-ऑक्टेन ॲक्शनचा अनुभव प्रेक्षकांना मिळणार आहे. महिला-केंद्रित ॲक्शनपट म्हणून ‘मैसा’कडे पाहिले जात आहे.

रश्मिकाचा नवा लूक आणि तिच्या व्यक्तिरेखेतील आक्रमकपणा टीझरचे विशेष आकर्षण ठरत आहे. सोशल मीडियावरही तिच्या या नव्या अवताराची चर्चा सुरू झाली आहे. त्यामुळे रश्मिकाला ॲक्शन भूमिकेत पाहण्यासाठी चाहत्यांची उत्सुकता वाढली आहे. ‘मैसा’ हा चित्रपट २७ नोव्हेंबर २०२६ रोजी चित्रपटगृहांमध्ये प्रदर्शित होणार आहे.