रत्नागिरी: महिला व बाल विकास विभाग, जिल्हा परिषद रत्नागिरी यांच्या वतीने राबविण्यात येत असलेल्या ‘सेवा संकल्प अभियान २०२६’ अंतर्गत अंगणवाडी मजगाव मुस्लिमवाडी (बीट कोतवडा नंबर १) येथे विविध लोकोपयोगी व प्रबोधनात्मक उपक्रमांचे आयोजन करण्यात आले होते. राष्ट्रीय पोषण माह, नवचेतना आणि आधारशिला या संयुक्त मोहिमांन्वये आयोजित या कार्यक्रमात बालकांचे आरोग्य, योग्य पोषण आहार आणि सर्वांगीण विकासावर विशेष भर देण्यात आला.
कार्यक्रमादरम्यान शून्य ते तीन वर्षे आणि तीन ते सहा वर्षे या वयोगटातील बालकांसाठी तसेच त्यांच्या पालकांसाठी मार्गदर्शन सत्रांचे आयोजन करण्यात आले होते. बालवयातील योग्य पोषण, किशोरवयीन बालिकांचे शारीरिक स्वास्थ, मातांचे आरोग्य आणि महिला व बालकांसाठी राबविल्या जाणाऱ्या विविध शासकीय कल्याणकारी योजनांची सविस्तर माहिती यावेळी उपस्थित महिलांना देण्यात आली. बालकांच्या मानसिक व शारीरिक विकासासाठी समुदाय सहभागाचे महत्त्व किती मोठे आहे, याबाबतही यावेळी उपस्थित मान्यवर व तज्ज्ञांनी मार्गदर्शन केले.
या उपक्रमाला मजगाव ग्रामपंचायतीचे माजी सरपंच फैयाज मुकादम, ज्येष्ठ पत्रकार रफीक मुकादम, पोलीस पाटील अशोक केळकर, ग्रामपंचायत अधिकारी अर्चना कळंबटे, अंगणवाडी सेविका नफिसा मुकादम यांच्यासह गावातील महिला व पालक मोठ्या संख्येने उपस्थित होते. बालविकास आणि आरोग्याविषयी जनजागृती निर्माण करणाऱ्या या उपक्रमाचे ग्रामस्थांकडून विशेष कौतुक करण्यात आले.
