लांजातील उद्योजक शिवाजी कोत्रे यांच्याकडून घरातच पर्यावरणपुरक पध्दतीने श्रींचे भावपूर्ण विसर्जन

लांजा/अरबाज नेवरेकर : गणेशोत्सवाचा पवित्र आनंद साजरा करत असतानाच निसर्गाशी असलेले नाते अधिक दृढ करत, लांजा येथील उद्योजक शिवाजी कोत्रे यांनी एक अत्यंत सुंदर आणि कौतुकास्पद पाऊल उचलले आहे. आपल्या ६ दिवसांच्या घरगुती गणपतीचे त्यांनी कोणत्याही सार्वजनिक पाणवठ्यावर न जाता, मोठ्या आपुलकीने आणि पर्यावरणपूरक पद्धतीने घराच्या घरीच विसर्जन केले.

सार्वजनिक जलाशयांचे प्रदूषण टळावे आणि निसर्गाची स्वच्छता राखली जावी, या उदात्त हेतूने त्यांनी एका मोठ्या पात्रामध्ये बाप्पाला निरोप दिला. “श्रींची भक्ती करताना आपण ज्या निसर्गाच्या कुशीत राहतो, त्याचे जतन करणे हे आपले निसर्गकर्तव्य आहे,” अशी साधी पण मार्मिक भावना शिवाजी कोत्रे यांनी याप्रसंगी व्यक्त केली.

कोत्रे कुटुंबीयांच्या या शांत आणि पर्यावरणस्नेही उपक्रमाचे परिसरातून मनापासून कौतुक होत असून, इतरांसाठीही हा एक प्रेरणादायी संदेश ठरत आहे. याप्रसंगी अमेय कोत्रे, अक्षय कोत्रे यांच्यासह कुटुंबातील सर्व सदस्य उपस्थित होते.