मुंबई : देशातील निवडणूक गैरव्यवहारांचे कथित सूत्रधार असल्याचा आरोप करत मुख्य निवडणूक आयुक्त ज्ञानेश कुमार यांच्याविरोधात कॉकरोच जनता पार्टीने (सीजेपी) आक्रमक पवित्रा घेत थेट दंड थोपाटले आहेत. ज्ञानेश कुमार यांनी पदाचा राजीनामा न दिल्यास येत्या २ ऑक्टोबर रोजी तीव्र आंदोलन छेडण्याचा इशारा पक्षाचे नेते अभिजीत दीपके यांनी आधीच दिला होता. मात्र, या नियोजित आंदोलनाला मुंबई पोलिसांनी परवानगी नाकारल्याने वातावरण अधिकच तापले आहे. पोलिसांच्या नकारानंतर मागे न हटता दीपके यांनी थेट ‘एक्स’वर अवघ्या दोन ओळींचा मेसेज पोस्ट करत, २ ऑक्टोबर रोजी मुंबईतील ऐतिहासिक शिवाजी पार्क मैदानात दुपारी ४ वाजता थेट ‘जेलभरो’ आंदोलन करण्याची मोठी घोषणा केली आहे.
“ज्ञानू, मस्ट गो… जावंच लागेल!” अशा दोन ओळींच्या रोखठोक ट्विटसह ‘#SaveDemocracy’ असा हॅशटॅग वापरत दीपके यांनी आंदोलनाची तारीख, वेळ, ठिकाण आणि स्वरूप जाहीर केले आहे. परवानगी नाकारल्यानंतर बॅकफूटवर जाण्याऐवजी थेट जेलभरोचा एल्गार पुकारल्याने केवळ मुख्य निवडणूक आयुक्तच नव्हे, तर मुंबई पोलीस आणि केंद्र सरकारच्या अडचणीतही मोठी वाढ होण्याची शक्यता वर्तवली जात आहे. त्यामुळे २ ऑक्टोबरच्या आधी ज्ञानेश कुमार यांच्या राजीनाम्यासंदर्भात काही घडामोडी घडतात का, याकडे राजकीय वर्तुळाच्या नजरा खिळल्या आहेत.
दुसरीकडे, याच मुद्द्यावरून राजकीय पटलावर मोठी खळबळ उडाली असून ठाकरे बंधूंनीही मुंबईत एका भव्य महामोर्चाचे आयोजन केले आहे. राज ठाकरे आणि उद्धव ठाकरे यांनी येत्या ४ ऑक्टोबर रोजी मुंबईत संयुक्त महामोर्चा काढण्याचा निर्णय घेतला आहे. विशेष म्हणजे, या महामोर्चामध्ये ज्येष्ठ नेते शरद पवार स्वतः प्रत्यक्ष सहभागी होणार असून अन्य विरोधी पक्षांच्या नेत्यांनीही यात मोठ्या संख्येने सहभागी व्हावे, असे आवाहन ठाकरे बंधूंनी केले आहे. हा महामोर्चा कुठून कुठे निघेल आणि त्याची नेमकी वेळ काय असेल, याची सविस्तर माहिती राज ठाकरे लवकरच जाहीर करणार आहेत. कॉकरोच जनता पार्टीचे जेलभरो आंदोलन आणि ठाकरे बंधूंचा नियोजित महामोर्चा यामुळे आगामी दिवसांत मुंबईतील राजकीय वातावरण चांगलेच तापणार असून संपूर्ण देशाचे लक्ष या आंदोलनांकडे लागले आहे.
