संगमेश्वर: मुंबई-गोवा राष्ट्रीय महामार्गाच्या चौपदरीकरणाचे काम संगमेश्वर तालुक्यात सुरू असताना महामार्गाला संगमेश्वर शहर आणि विविध गावांना जोडणाऱ्या जोडरस्त्यांची मोठ्या प्रमाणात दुरवस्था झाली आहे. विशेषतः माभळे परिसरातील जोडरस्त्यांवर ठिकठिकाणी पडलेल्या खड्ड्यांमुळे वाहनचालक व प्रवाशांना प्रचंड त्रासाला सामोरे जावे लागत आहे. महामार्गाच्या कामासाठी माती, खडी आणि इतर साहित्याची मोठ्या प्रमाणावर होणारी अवजड वाहतूक तसेच पाऊस यामुळे गावांना जोडणाऱ्या रस्त्यांची अवस्था दिवसेंदिवस बिकट बनली आहे. या खड्ड्यांमुळे दुचाकीस्वार व चारचाकी वाहनचालकांना तारेवरची कसरत करावी लागत असून अपघातांच्या घटनांमध्येही वाढ होत आहे. ग्रामस्थांनी रस्त्यांच्या दुरवस्थेविरोधात आंदोलनाचा इशारा दिल्यानंतर संबंधित ठेकेदार कंपनीने काही ठिकाणी केवळ खडी टाकून तात्पुरती मलमपट्टी केली खरी; मात्र अवजड वाहतुकीमुळे हे रस्ते पुन्हा उखडत असल्याने अशा तकलादू उपायांऐवजी कायमस्वरूपी डांबरीकरण नेमके कधी होणार, असा थेट सवाल स्थानिक नागरिकांकडून उपस्थित केला जात आहे.
रस्त्यांच्या समस्येसोबतच महामार्गाच्या कामाचा मोठा फटका स्थानिक शेतकरी आणि सार्वजनिक सुविधांना बसला आहे. माभळे परिसरातील शेतकऱ्यांचे शेतीकडे जाणारे मार्ग बंद होणे, पाण्याचा निचरा न होणे आणि वाहतुकीतील अडथळ्यांमुळे मोठे नुकसान होत असून या नुकसानाची पाहणी करून योग्य ती भरपाई आणि आवश्यक सुविधा देण्याची मागणी जोर धरत आहे. याशिवाय परिसरातील स्मशानभूमी तसेच गणेश विसर्जन घाटाचीही महामार्गाच्या कामामुळे दुरवस्था झाली असून वारंवार पाठपुरावा करूनही त्यावर कोणतीही ठोस कार्यवाही झालेली नाही. त्यामुळे संबंधित ठेकेदार कंपनीने केवळ खडी टाकण्याचे सोपस्कार थांबवून जोडरस्ते, स्मशानभूमी, विसर्जन घाट आणि शेतकऱ्यांच्या प्रश्नांवर कायमस्वरूपी तोडगा काढावा, तसेच प्रत्येक काम सुरू करण्याचे आणि पूर्ण करण्याचे अधिकृत वेळापत्रक जाहीर करावे, अशी मागणी पुढे आली आहे. वारंवार इशारा देऊनही दुर्लक्ष करणाऱ्या प्रशासनाने व कंपनीने या सर्व समस्यांची तातडीने दखल न घेतल्यास तीव्र आंदोलन छेडण्याचा इशारा माभळे परिसरातील ग्रामस्थांनी दिला आहे.
