रत्नागिरी: बदलत्या हवामानामुळे फळपिकांच्या उत्पादनात होणारी घट आणि त्यामुळे बागायतदारांना सोसावे लागणारे आर्थिक नुकसान लक्षात घेऊन कृषी विभागामार्फत जिल्ह्यात सन २०२६-२७ या वर्षासाठी पुनर्रचित हवामान आधारित फळपीक विमा योजना लागू करण्यात आली आहे. जिल्ह्यातील आंबा, काजू, नारळ आणि सुपारी या चार प्रमुख फळपिकांना या योजनेतून भक्कम आर्थिक संरक्षण मिळणार असून, बागायतदारांनी अंतिम मुदतीची वाट न पाहता तातडीने विमा हप्ता भरून नोंदणी पूर्ण करावी, असे आवाहन जिल्हा अधीक्षक कृषी अधिकारी शिवकुमार सदाफुले यांनी केले आहे. जिल्ह्यातील लोकप्रतिनिधी व कृषी विभागाने शासनाकडे केलेल्या सातत्यपूर्ण पाठपुराव्यामुळे यावर्षी विशेषतः आंबा उत्पादक शेतकऱ्यांना मोठा दिलासा मिळाला असून, आंब्याचा संरक्षण कालावधी १५ मे ऐवजी आता थेट ३१ मे पर्यंत वाढविण्यात आला आहे, तर शेतकऱ्यांचा विमा हप्ता हेक्टरी १३ हजार ६०० रुपयांवरून थेट ८ हजार ५०० रुपयांपर्यंत कमी करण्यात आला आहे.
जिल्ह्यात बजाज जनरल इन्शुरन्स कंपनीमार्फत ही योजना राबविली जात असून कर्जदार तसेच बिगर कर्जदार अशा दोन्ही प्रवर्गातील शेतकऱ्यांना यात सहभागी होता येणार आहे. योजनेअंतर्गत आंबा पिकासाठी हेक्टरी १ लाख ७० हजार रुपयांच्या संरक्षित रकमेसाठी ८ हजार ५०० रुपये हप्ता, काजूसाठी १ लाख २० हजार रुपयांच्या संरक्षित रकमेसाठी ६ हजार रुपये हप्ता, नारळासाठी १ लाख ७० हजार रुपयांच्या संरक्षित रकमेसाठी ८ हजार ५०० रुपये हप्ता, तर सुपारी पिकासाठी १ लाख रुपयांच्या संरक्षित रकमेसाठी ५ हजार रुपये इतका प्रति हेक्टरी शेतकरी हप्ता निश्चित करण्यात आला आहे. जिल्ह्यातील अधिसूचित ८३ महसूल मंडळांमध्ये आंबा व काजूसाठी, ५३ मंडळांमध्ये नारळासाठी आणि २३ महसूल मंडळांमध्ये सुपारीसाठी हे संरक्षण लागू राहील. अधिसूचित हवामान केंद्रांवर नोंदवले जाणारे कमाल व किमान तापमान, पाऊस, हवेतील आर्द्रता आणि वाऱ्याचा वेग हे घटक निर्धारित निकषांपेक्षा प्रतिकूल ठरल्यास शेतकऱ्यांना थेट नुकसानभरपाई दिली जाणार आहे.
या विमा योजनेचा लाभ घेण्यासाठी शेतकऱ्यांकडे ‘ॲग्रीस्टॅक’ अंतर्गत फार्मर आयडी असणे आणि ‘ई-पीक पाहणी’ मोबाईल ॲपद्वारे संबंधित फळपिकाची नोंद केलेली असणे बंधनकारक आहे. शेतकरी आपले सरकार सेवा केंद्र, बँक अथवा अधिकृत पोर्टलद्वारे ऑनलाइन हप्ता भरू शकणार असून, अर्जासोबत फळबागेचा जिओ-टॅगिंग असलेला फोटो अपलोड करणे अनिवार्य करण्यात आले आहे. नारळ व सुपारी पिकांसाठी विमा हप्ता भरण्याची अंतिम मुदत ३१ ऑक्टोबर २०२६ ही असून आंबा व काजूसाठी ३० नोव्हेंबर २०२६ ही अंतिम तारीख आहे. योजनेच्या अधिक माहितीसाठी शेतकऱ्यांनी गावातील कृषी सहायक, तालुका कृषी अधिकारी कार्यालय अथवा विमा कंपनीचे जिल्हा प्रतिनिधी प्रतिकेश शिगवण (९८८१९६७२३३) यांच्याशी संपर्क साधावा, असे कृषी विभागाकडून स्पष्ट करण्यात आले आहे.
