वाढीव बिले व कथित २२०० फॉल्टी मीटरवरून अधिकाऱ्यांना घेरले, स्मार्ट मीटर सक्तीला कडाडून विरोध
लांजा / अरबाज नेवरेकर: रत्नागिरी जिल्ह्यातील लांजा तालुक्यात सलग पाच-सहा महिने मीटरचे रीडिंग न घेणे, परस्पर भरमसाठ सरासरी बिले पाठवून सामान्य ग्राहकांची आर्थिक पिळवणूक करणे आणि त्यानंतर मीटर नादुरुस्त असल्याचे भासवून परस्पर स्मार्ट मीटरची सक्ती करणे या महावितरणच्या संशयास्पद व मनमानी कारभाराविरोधात शिवसेना उद्धव बाळासाहेब ठाकरे पक्षाने जोरदार एल्गार पुकारला आहे. या संपूर्ण अनागोंदी कारभाराची निष्पक्ष व पारदर्शक चौकशी करून अन्यायग्रस्त वीजग्राहकांना न्याय मिळवून द्यावा, तसेच कोणत्याही परिस्थितीत जनतेवर स्मार्ट मीटर लादण्याचा प्रयत्न करू नये, असा थेट इशारा शिवसेनेने दिला आहे. शिवसेना लांजा तालुकाप्रमुख युवराज हांदे यांच्या नेतृत्वाखालील शिष्टमंडळाने स्थानिक महावितरण कार्यालयावर धडक देत संबंधित अधिकाऱ्यांना जाब विचारला आणि प्रश्नांची सरबत्ती करत चांगलेच धारेवर धरले.
तालुक्यातील अनेक भागांमध्ये गेल्या पाच ते सहा महिन्यांपासून मीटर रीडिंगच घेतले जात नसल्याच्या नागरिकांच्या तीव्र तक्रारी असून, त्यामुळे ग्राहकांच्या माथी अव्वाच्या सव्वा रकमेची सरासरी बिले मारली जात आहेत. संतप्त ग्राहकांनी महावितरणकडे तक्रार केल्यानंतर बिलांमध्ये थातूरमातूर कपात केली जाते; मात्र त्याच वेळी मूळ मीटर फॉल्टी असल्याचे कारण पुढे करून नव्या मीटरसाठी अर्ज भरण्यास भाग पाडले जात असल्याचा गंभीर आरोप पक्षाने केला आहे. वेळेवर अचूक रीडिंग घेऊन प्रत्यक्ष वीजवापरानुसार बिले देणे आणि सदोष बिले दुरुस्त करून देणे हे महावितरणचे मूलभूत कर्तव्य असताना निष्पाप ग्राहकांना कार्यालयाचे उंबरठे का झिजवावे लागतात, असा संतप्त सवाल यावेळी अधिकाऱ्यांना विचारण्यात आला.
तालुक्यात तब्बल २२०० मीटर नादुरुस्त असल्याचा दावा प्रशासनाकडून केला जात असला, तरी हा आकडा कोणत्या तांत्रिक निकषांवर निश्चित करण्यात आला, मीटरची प्रत्यक्ष जागेवर तपासणी कोणी केली, त्याचे लेखी तपासणी अहवाल उपलब्ध आहेत का आणि त्याचे निष्कर्ष संबंधित ग्राहकांना कळवले गेले आहेत का, असे थेट प्रश्न उपस्थित करत शिवसेनेने या दाव्यातील हवा काढून घेतली. प्रत्येक संशयित मीटरची नियमानुसार स्वतंत्र तपासणी करून नादुरुस्तीचा अधिकृत निष्कर्ष ग्राहकांना लेखी स्वरूपात देणे बंधनकारक असल्याचे स्पष्ट करण्यात आले. अधिकृत तपासणीत मीटर खरोखरच नादुरुस्त आढळल्यास नियमानुसार पर्याय द्यावेत; परंतु या प्रक्रियेचा गैरफायदा घेऊन ग्राहकांवर स्मार्ट मीटरची जबरदस्ती करणे खपवून घेतले जाणार नाही. ग्राहकांच्या पूर्वपरवानगीशिवाय परस्पर जुने मीटर काढून स्मार्ट मीटर बसवण्याचा आगाऊपणा केल्यास कायदेशीर मार्गाने दाद मागून संबंधितांवर मीटर चोरीचे थेट गुन्हे दाखल करू, असा सज्जड दमही यावेळी देण्यात आला.
ग्राहकांच्या हक्कांचे सर्रास उल्लंघन खपवून घेतले जाणार नसून केवळ पोकळ आश्वासने न देता प्रत्यक्ष कृतीतून ही चुकीची बिले दुरुस्त करावीत आणि संपूर्ण प्रक्रिया पारदर्शक करावी, अशी मागणी करण्यात आली. महावितरण अधिकाऱ्यांची भेट घेऊन जाब विचारताना तालुकाप्रमुख युवराज हांदे यांच्यासमवेत विभागप्रमुख लक्ष्मण मोर्ये, उपशहरप्रमुख प्रकाश ऊर्फ बाबू गुरव, सागर वायंगणकर, उपविभागप्रमुख राजेंद्र सुर्वे, जितेंद्र कदम, शांताराम गुरव, अल्लादिन नेवरेकर, बाबा धावणे, दिनेश गुरव, विघ्नेश गुरव, दामोदर खामकर यांच्यासह अनेक पदाधिकारी व शिवसैनिक मोठ्या संख्येने उपस्थित होते.
