रत्नागिरी : गेल्या पाच-सहा वर्षांपासून तीव्र विरोध आणि संभ्रमाच्या भोवऱ्यात अडकलेल्या वाटद एमआयडीसी तसेच प्रस्तावित डिफेन्स क्लस्टरच्या तिढ्यावर अखेर तोडगा निघण्याचे संकेत मिळाले आहेत. एमआयडीसी विरोधी संघर्ष समिती आणि स्थानिक ग्रामस्थांसोबत झालेल्या अत्यंत सकारात्मक चर्चेनंतर, स्थानिकांना कोणताही त्रास होऊ दिला जाणार नाही अशी ग्वाही देत राज्याचे उद्योगमंत्री उदय सामंत यांनी डिफेन्स क्लस्टरचा फेरविचार करण्याचे आश्वासन दिले आहे. याशिवाय प्रकल्पबाधित शेतकऱ्यांच्या घरांवरील सरकारी नोंदी तात्काळ हटवण्याचे तसेच वहिवाटीच्या दाव्यांवर कोणत्याही राजकीय हस्तक्षेपाशिवाय गुणवत्तेच्या आधारे निर्णय घेण्याचे थेट निर्देश त्यांनी प्रशासनाला दिले आहेत. रत्नागिरीत आयोजित पत्रकार परिषदेत त्यांनी या महत्त्वपूर्ण निर्णयांची माहिती दिली.
या बैठकीस आमदार किरण सामंत, प्रख्यात विधीज्ञ ॲड. असीम सरोदे, प्रांताधिकारी यांच्यासह संघर्ष समितीचे प्रतिनिधी प्रथमेश गवाणकर, संतोष बारगुडे व त्यांचे सहकारी उपस्थित होते. वाटद एमआयडीसीच्या स्थापनेपासूनच या प्रकल्पावरून स्थानिक पातळीवर दोन परस्परविरोधी गट निर्माण झाले होते. मात्र, राज्याचा उद्योगमंत्री म्हणून संघर्ष समितीसोबत अत्यंत सलोख्याच्या व कौटुंबिक वातावरणात सविस्तर चर्चा घडवून आणल्याचे सामंत यांनी स्पष्ट केले. बैठकीदरम्यान कृती समितीने डिफेन्स क्लस्टरचा फेरविचार करणे, घरांवरील नोंदी रद्द करणे आणि वहिवाटीच्या दाव्यांचे निपक्षपातीपणे सातबारे देणे या तीन प्रमुख मागण्या लावून धरल्या होत्या. या मागण्यांवर सकारात्मक पावले टाकत, पुढील मार्ग काढण्यासाठी अनंत चतुर्दशीनंतर येत्या २८ किंवा २९ तारखेला प्रांताधिकारी आणि कृती समितीची विशेष संयुक्त बैठक घेण्याचे निश्चित करण्यात आले आहे.
प्रस्तावित १००० एकरच्या डिफेन्स क्लस्टरमुळे जर स्थानिक जनतेला नाहक त्रास होणार असेल, तर त्याबाबत सविस्तर व गोपनीय अहवाल सादर करण्याचे निर्देश प्रांताधिकाऱ्यांना देण्यात आले आहेत. हा अहवाल हाती आल्यानंतर वस्तुस्थिती तपासून क्लस्टरबाबत ठोस पुनर्विचार केला जाईल, असा विश्वास उद्योगमंत्र्यांनी व्यक्त केला. त्याचबरोबर ग्रामस्थांचे रोजगार, शेतजमिनी आणि कातळ जमिनींचे योग्य दर या सर्व घटकांमध्ये पूर्ण पारदर्शकता राहावी यासाठी प्रत्येक गावात जाऊन थेट संवाद बैठका घेण्याच्या सूचनाही प्रशासनाला दिल्या आहेत. एमआयडीसीचा अध्यक्ष आणि उद्योगमंत्री म्हणून आपण स्थानिक शेतकरी व ग्रामस्थांच्या पाठीशी खंबीरपणे उभे असून त्यांच्या हिताला तडा जाऊ देणार नाही, असा विश्वासही त्यांनी यावेळी व्यक्त केला.
