१,०५९.८६ हेक्टर क्षेत्रावरील भातशेतीचे नुकसान; दुष्काळी तालुका जाहीर झाल्याने शेतकऱ्यांना मदतीची अपेक्षा
लांजा (अरबाज नेवरेकर) : लांजा तालुक्यात पावसाच्या अनियमिततेमुळे भातशेतीचे मोठ्या प्रमाणावर नुकसान झाले असून, आतापर्यंत १,०५९.८६ हेक्टर क्षेत्रावरील ४,४५४ शेतकऱ्यांच्या नुकसानग्रस्त भातशेतीचे पंचनामे पूर्ण करण्यात आले आहेत. याबाबतची माहिती तालुका कृषी अधिकारी अभिजीत शेलार यांनी दिली. दरम्यान, शासनाने लांजा तालुका दुष्काळी जाहीर केल्याने नुकसानग्रस्त शेतकऱ्यांना आर्थिक मदत मिळण्याच्या आशा पल्लवित झाल्या आहेत.
यंदा पावसाचे आगमन उशिरा झाले असले तरी सुरुवातीच्या काळात समाधानकारक पाऊस झाल्याने शेतकऱ्यांनी मोठ्या आशेने भातलावणी केली होती. मात्र, ऐन पीक वाढीच्या महत्त्वाच्या टप्प्यावर पावसाने दडी मारल्याने शेतकऱ्यांच्या अडचणीत भर पडली. काही भागांत भातपीक पसवण्याच्या अवस्थेत होते, तर काही ठिकाणी लोंब्यांमध्ये दाणे भरण्याची प्रक्रिया सुरू होती. अशा परिस्थितीत पावसाचा खंड पडल्याने भातपिकाला मोठा फटका बसला.
भातपीक गर्भावस्थेत असताना त्याला मोठ्या प्रमाणात पाण्याची आवश्यकता असते. मात्र, कडक उन्हामुळे शेतातील ओलावा कमी झाला. परिणामी अनेक ठिकाणी भातपीक करपले असून, विशेषतः कातळावरील भातशेतीचे मोठे नुकसान झाले आहे. वर्षभराच्या उदरनिर्वाहासाठी शेतीवर अवलंबून असलेल्या शेतकऱ्यांसमोर यामुळे आर्थिक संकट उभे राहिले आहे.
दरम्यान, लांजा तालुका दुष्काळी जाहीर होण्यापूर्वीच तालुका कृषी अधिकारी अभिजीत शेलार यांनी आपल्या पथकासह नुकसानग्रस्त भागांची पाहणी सुरू केली होती. कृषी विभागाच्या कर्मचाऱ्यांनी थेट शेतकऱ्यांच्या बांधावर जाऊन नुकसानीची माहिती घेत पंचनाम्यांची प्रक्रिया राबवली.
लांजा तालुक्यात आतापर्यंत १,०५९.८६ हेक्टर क्षेत्रावरील ४,४५४ शेतकऱ्यांच्या नुकसानग्रस्त भातशेतीचे पंचनामे पूर्ण झाले असून, उर्वरित नुकसानीचे पंचनामे करण्याचे काम सुरू आहे, अशी माहिती तालुका कृषी अधिकारी अभिजीत शेलार यांनी दिली.
शासनाने लांजा तालुका दुष्काळी जाहीर केल्यामुळे शेतकऱ्यांना दिलासा मिळाला असला तरी प्रत्यक्ष आर्थिक मदत कधी मिळणार, याकडे नुकसानग्रस्त शेतकऱ्यांचे लक्ष लागले आहे. पंचनाम्यांच्या आधारे शासनाने लवकरात लवकर नुकसानभरपाई उपलब्ध करून द्यावी, अशी अपेक्षा शेतकरी वर्गातून व्यक्त होत आहे.
