चिपळूण: चिपळूण पोलीस ठाण्याच्या हद्दीत अवैध धंद्यांविरोधात पोलिसांनी धडक मोहीम हाती घेतली असून, वालोपे येथील नदीकिनारी सुरू असलेल्या गावठी दारूच्या हातभट्टीवर धाड टाकून पोलिसांनी मोठी कारवाई केली आहे. चिपळूण पोलीस ठाण्याचे पथक परिसरात नियमित गस्त घालत असताना मिळालेल्या गोपनीय माहितीच्या आधारे ही धडक कारवाई करण्यात आली. नदीकाठच्या दुर्गम भागात चालविल्या जाणाऱ्या या हातभट्टी अड्ड्यावरून तयार गावठी दारू, दारूनिर्मितीसाठी लागणारे रसायन आणि हातभट्टीचे सर्व साहित्य असा एकूण १ लाख ४८ हजार ९५० रुपये किमतीचा मुद्देमाल पोलिसांनी ताब्यात घेतला व कारवाईदरम्यान तो जागेवरच पूर्णपणे नष्ट केला. जिल्हा पोलीस अधीक्षक नितीन बगाटे व अपर पोलीस अधीक्षक बी. बी. महामुनी यांच्या मार्गदर्शनाखाली, तसेच उपविभागीय पोलीस अधिकारी प्रकाश बेले यांच्या नेतृत्वाखाली पोलीस निरीक्षक फुलचंद मेंगडे आणि त्यांच्या पथकाने ही यशस्वी कामगिरी बजावली असून, परिसरातील अवैध धंदे चालवणाऱ्यांवर यापुढेही अशीच कडक कारवाई सुरू राहील असा इशारा पोलिसांनी दिला आहे.
चिपळूणमध्ये वालोपे येथील नदीकिनारी अवैध हातभट्टीवर पोलिसांचा छापा; दीड लाखांचे दारू व रसायन जागेवरच केले नष्ट
