चिपळूण : तालुक्यातील पेढांबे उगवतीवाडी येथील ८१ वर्षीय वृद्धाचा वाशिष्टी नदीच्या पात्रात बुडून दुर्दैवी मृत्यू झाल्याची घटना समोर आली आहे. गुणाजी राजाराम शिंदे असे मृत वृद्धाचे नाव असून, त्यांचा मृतदेह पेढांबे ब्रिज परिसरातील नदीपात्रात आढळून आला.
पोलिसांनी दिलेल्या माहितीनुसार, गुणाजी शिंदे हे २४ सप्टेंबर रोजी सकाळपासून बेपत्ता होते. कुटुंबीयांकडून त्यांचा शोध घेतला जात असताना २५ सप्टेंबर रोजी दुपारी सुमारे १२.१५ वाजण्याच्या सुमारास पेढांबे ब्रिज, उगवतीवाडी परिसरातील वाशिष्टी नदीच्या पात्रात त्यांचा मृतदेह पाण्यावर तरंगताना आढळून आला.
या घटनेची माहिती मिळताच संबंधितांनी पोलिसांना कळविले. पोलिसांनी घटनास्थळी जाऊन मृतदेह ताब्यात घेतला. नदीच्या पाण्यात बुडाल्याने गुणाजी शिंदे यांचा मृत्यू झाल्याचे प्राथमिक माहितीतून समोर आले आहे. या प्रकरणी त्यांचे भाऊ गणपत राजाराम शिंदे यांनी दिलेल्या खबरीवरून अलोरे शिरगाव पोलीस ठाण्यात अकस्मात मृत्यू क्र. २०/२०२६, BNSS कलम १९४ अन्वये नोंद करण्यात आली आहे. घटनेची पुढील कार्यवाही अलोरे शिरगाव पोलीस करीत आहेत.
