लांजा/अरबाज नेवरेकर : महाराष्ट्रातील टेनिस क्रिकेट खेळाडूंना आपले कौशल्य सिद्ध करण्याची संधी उपलब्ध करून देण्याच्या उद्देशाने आयोजित महाराष्ट्र टेनिस क्रिकेट चॅम्पियन्स ट्रॉफीच्या निवड चाचणीला लांजात उत्स्फूर्त प्रतिसाद मिळाला. लांजा येथील खानविलकर मैदानावर झालेल्या या निवड चाचणीत रत्नागिरी, सिंधुदुर्ग, कोल्हापूर, पुणे आणि मुंबई येथील एकूण १२५ युवा खेळाडूंनी सहभाग घेतला.
महाराष्ट्र टेनिस क्रिकेट चॅम्पियन्स लीगचे संस्थापक व अध्यक्ष तथा उद्योगमंत्री उदय सामंत आणि आमदार किरण सामंत यांच्या मार्गदर्शनाखाली एकनाथ सोलकर फाउंडेशनच्या वतीने या स्पर्धेचे आयोजन करण्यात आले आहे. लांजा येथील निवड चाचणीचे उद्घाटन रत्नागिरी जिल्हा क्रिकेट असोसिएशनचे उपाध्यक्ष तथा नगरसेवक बाळू साळवी यांच्या हस्ते करण्यात आले.
यावेळी एकनाथ सोलकर फाउंडेशनचे संस्थापक ब्रिजेश सोलकर, भरत लोहार, दीपक पवार, भूपेंद्र सिन्हा, प्रवीण घेवारी, गणेश कामटे आदी उपस्थित होते. निवड चाचणीदरम्यान खेळाडूंच्या क्रिकेटमधील कौशल्याचे मूल्यमापन करण्यासाठी मुंबईतील माजी क्रिकेटपटू उमेश मांजरेकर, कल्याणी घोरपडे, करुणा कोटियान, प्रशांत गावडे यांच्यासह रत्नागिरीतील दीपक मोरे, दिवाकर मयेकर, सईद मुकदम, गिरीश कोचरेकर, दिनेश माईन, सोनम चव्हाण आणि सुधा पवार उपस्थित होते.
या निवड चाचणीत सहभागी झालेल्या खेळाडूंनी फलंदाजी, गोलंदाजी आणि क्षेत्ररक्षणातील आपली गुणवत्ता दाखवून दिली. उपस्थित क्रिकेटपटूंनी खेळाडूंच्या कामगिरीचे निरीक्षण करून त्यांच्या कौशल्याची पारख केली.
राज्यातील होतकरू आणि गुणवत्तावान टेनिस क्रिकेट खेळाडूंना राज्यस्तरीय स्पर्धेत सहभागी होण्याची संधी मिळावी, यासाठी ९ ऑक्टोबर ते ४ नोव्हेंबर २०२६ या कालावधीत महाराष्ट्रातील विविध ठिकाणी निवड चाचण्यांचे आयोजन करण्यात आले आहे. या उपक्रमासाठी आतापर्यंत राज्यभरातील १५०० हून अधिक खेळाडूंनी ऑनलाइन नोंदणी केली आहे. त्याचबरोबर निवड चाचणीच्या ठिकाणी प्रत्यक्ष नोंदणी करण्यासाठीही खेळाडूंचा प्रतिसाद मिळत आहे.
यापूर्वी छत्रपती संभाजीनगर, अकोला आणि शिर्डी येथे विविध जिल्ह्यांतील खेळाडूंसाठी निवड चाचण्या घेण्यात आल्या आहेत. पुढील टप्प्यात २२ ऑक्टोबर रोजी सोलापूर येथे सोलापूर, सांगली, धाराशिव आणि लातूर जिल्ह्यांतील खेळाडूंसाठी निवड चाचणी होणार आहे. त्यानंतर २४ व २५ ऑक्टोबर रोजी पुणे येथे पुणे व सातारा जिल्ह्यांसाठी, २८ व २९ ऑक्टोबर रोजी रायगड येथे, तर ३१ ऑक्टोबर रोजी पालघर येथे निवड चाचणी आयोजित करण्यात आली आहे.
तसेच २ व ३ नोव्हेंबर रोजी ठाणे जिल्ह्यातील खेळाडूंसाठी भिवंडी येथे आणि ४ नोव्हेंबर रोजी मुंबईतील खेळाडूंसाठी विक्रोळी येथे निवड चाचणी होणार आहे.
महाराष्ट्रातील टेनिस क्रिकेट क्षेत्रातील नवोदित खेळाडूंना आपली गुणवत्ता दाखविण्यासाठी या निवड चाचण्या महत्त्वाची संधी ठरणार आहेत. राज्यातील जास्तीत जास्त खेळाडूंनी या उपक्रमात सहभागी होऊन आपल्या क्रीडा कौशल्याला वाव द्यावा, असे आवाहन उद्योगमंत्री उदय सामंत यांनी केले आहे.
