लांजा : तालुक्यात सध्या ऑक्टोबर हिटचा तडाखा वाढू लागल्याने कडक उन्हाचा थेट फटका शालेय विद्यार्थ्यांना बसत आहे. दुपारच्या वेळेत तीव्र तापमानामुळे विद्यार्थ्यांच्या आरोग्यावर विपरीत परिणाम होण्याची शक्यता निर्माण झाल्याने तालुक्यातील सर्व शाळा तात्पुरत्या स्वरूपात सकाळच्या सत्रात भरवण्यात याव्यात, अशी ठाम मागणी शिवसेना (उद्धव बाळासाहेब ठाकरे) पक्षाच्या वतीने करण्यात आली आहे. यासंदर्भात तालुकाप्रमुख युवराज हांदे यांच्या नेतृत्वाखालील शिष्टमंडळाने लांजा पंचायत समितीच्या गटशिक्षणाधिकाऱ्यांची भेट घेऊन त्यांना सविस्तर निवेदन सुपूर्द केले.
दुपारच्या कडक उन्हात शाळेत ये-जा करताना आणि वर्गात बसताना लहान मुलांना उकाड्याचा प्रचंड त्रास सहन करावा लागत आहे. या वाढत्या उष्णतेमुळे विद्यार्थ्यांमध्ये डिहायड्रेशन, अशक्तपणा, चक्कर येणे तसेच उष्माघाताचा धोका संभवतो. या प्रतिकूल परिस्थितीचा परिणाम मुलांच्या एकाग्रतेवर आणि एकूणच अध्ययन प्रक्रियेवर होत असल्याकडे निवेदनात लक्ष वेधण्यात आले आहे. शैक्षणिक वेळापत्रकापेक्षा विद्यार्थ्यांचे आरोग्य आणि सुरक्षितता अधिक मोलाची असल्याने प्रशासनाने हवामान सुसह्य होईपर्यंत शाळा सकाळच्या वेळेत भरवण्याबाबत तात्काळ आदेश जारी करावेत, असे निवेदनात स्पष्ट करण्यात आले आहे. पालक व ग्रामस्थांच्या भावना लक्षात घेऊन प्रशासनाने विनाविलंब सकारात्मक निर्णय घ्यावा, अशी अपेक्षा यावेळी व्यक्त करण्यात आली.
निवेदन सादर करतेवेळी शिवसेना तालुकाप्रमुख युवराज हांदे यांच्यासह शहरप्रमुख मोहन तोडकरी, विभागप्रमुख विश्वास मांडवकर, उपशहरप्रमुख बाबू गुरव, उपविभागप्रमुख अल्लादिन नेवरेकर, राजेंद्र सुर्वे, शांताराम गुरव, महेंद्र पाल्ये आणि शिवसैनिक बेर्डे सर उपस्थित होते. दरम्यान, या निवेदनाच्या प्रती रत्नागिरी जिल्हा परिषदेचे प्राथमिक शिक्षणाधिकारी आणि लांजा पंचायत समितीचे गटविकास अधिकारी यांनाही पुढील आवश्यक कार्यवाहीसाठी पाठवण्यात आल्या आहेत.
