लांजा/ अरबाज नेवरेकर: रत्नागिरी जिल्हा पोलीस दलाच्या वतीने गावपातळीवरील शांतता, सुव्यवस्था अधिक बळकट करण्यासाठी आणि नागरिकांमध्ये कायदेविषयक साक्षरता रुजवण्यासाठी राबवण्यात येणाऱ्या ‘मिशन पोलीस पाटील’ व ‘मिशन प्रबोधन’ उपक्रमांतर्गत लांजा तालुक्यात विशेष जनजागृतीपर कार्यक्रमांचे आयोजन करण्यात आले होते. जिल्हा पोलीस अधीक्षक नितीन दत्तात्रय बगाटे (भा.पो.से.) यांच्या प्रमुख उपस्थितीत पार पडलेल्या या कार्यक्रमात पोलीस पाटील आणि महिला बचत गटांच्या सदस्यांना कायदा-सुव्यवस्था, महिला सुरक्षा तसेच वाढत्या सायबर गुन्ह्यांविषयी मार्गदर्शन करण्यात आले. या वेळी लांजा उपविभागीय पोलीस अधिकारी सुरेश कदम आणि लांजा पोलीस ठाण्याचे पोलीस निरीक्षक निळकंठ बगळे उपस्थित होते.
‘मिशन पोलीस पाटील’ अंतर्गत लांजा पोलीस ठाण्यात आयोजित बैठकीत आगामी सण-उत्सवांच्या पार्श्वभूमीवर गावागावांत सामाजिक सलोखा आणि शांतता अबाधित राखण्याबाबत पोलीस अधीक्षक नितीन बगाटे यांनी तालुक्यातील पोलीस पाटलांना सूचना दिल्या. गावात घडणाऱ्या संशयास्पद हालचालींची व महत्त्वाच्या घडामोडींची माहिती विनाविलंब पोलिसांना देऊन संभाव्य अनुचित प्रकार रोखण्यासाठी सतर्क राहण्याचे आवाहन त्यांनी केले. पोलीस पाटील हा गावपातळीवर पोलीस प्रशासनाचा अत्यंत महत्त्वाचा दुवा असल्याचे नमूद करत, जिल्हा पोलिसांच्या उपक्रमांना सक्रिय सहकार्य करणाऱ्या पोलीस पाटलांचे त्यांनी विशेष कौतुक केले.
तसेच ‘मिशन प्रबोधन’ व ‘सेवा संकल्प अभियान’ अंतर्गत लांजा येथील त्रिमूर्ती हॉलमध्ये महिला बचत गटांच्या सदस्यांसाठी विशेष मार्गदर्शन मेळावा पार पडला. या मेळाव्यात उपस्थित अधिकाऱ्यांनी महिलांचे कायदेशीर अधिकार, महिला सुरक्षा, कौटुंबिक हिंसाचार प्रतिबंधक कायदे, अंमली पदार्थांचे दुष्परिणाम, वाहतूक नियम आणि डिजिटल युगातील सायबर गुन्ह्यांचे धोके यावर सविस्तर माहिती दिली. कोणत्याही प्रकारचा अन्याय अथवा छळ झाल्यास महिलांनी निर्भयपणे पुढे येऊन पोलिसांची मदत घ्यावी, असे आवाहन करतानाच आपत्कालीन मदतीसाठी ‘डायल ११२’ आणि सायबर फसवणुकीच्या तक्रारीसाठी ‘१९३०’ या हेल्पलाइन क्रमांकांचा वापर करण्याचे आवाहन जिल्हा पोलीस दलाकडून करण्यात आले.
