मुंबई : दिवाळी सणाच्या पार्श्वभूमीवर महाराष्ट्रातील दुष्काळग्रस्त शेतकऱ्यांना मोठा आर्थिक दिलासा देत प्रधानमंत्री नरेंद्र मोदी यांनी ‘प्रधानमंत्री किसान सन्मान निधी’ योजनेच्या २४ व्या हप्त्यापोटी राज्यातील तब्बल ९१ लाख १२ हजार ७६५ शेतकऱ्यांच्या बँक खात्यांत १ हजार ८३५ कोटी रुपयांचा निधी थेट वर्ग केला. गुजरात राज्यातील बनासकांठा येथे आयोजित भव्य कार्यक्रमातून एका क्लिकवर हा निधी हस्तांतरित करण्यात आला असून, या विशेष सोहळ्यात मुख्यमंत्री देवेंद्र फडणवीस यांनी ‘वर्षा’ निवासस्थानावरून दूरदृश्य संवाद प्रणालीद्वारे उपस्थिती दर्शवली, तर यावेळी कृषी विभागाचे सचिव परिमल सिंग हेदेखील उपस्थित होते. शेतकऱ्यांचे उत्पन्न वाढविण्यासाठी केंद्र सरकार केवळ आर्थिक सहाय्यापुरते मर्यादित न राहता विज्ञान, आधुनिक तंत्रज्ञान, शाश्वत सिंचन, पशुपालन आणि शेतीपूरक व्यवसायांना सर्वोच्च प्राधान्य देत असल्याचे प्रतिपादन प्रधानमंत्री मोदी यांनी आपल्या भाषणात केले. केंद्र सरकारच्या शेतकरीकेंद्री धोरणांमुळे गेल्या काही वर्षांत देशातील शेतकऱ्यांच्या हाती ५० लाख कोटी रुपयांपेक्षा अधिक रक्कम पोहोचली अथवा त्यांच्या खर्चात मोठी बचत झाली असल्याचे सांगत, देशातील ८५ टक्क्यांपेक्षा जास्त असलेल्या अल्प व अत्यल्प भूधारक लहान शेतकऱ्यांना पीएम किसान सन्मान निधीच्या माध्यमातून आजवर सुमारे ४ लाख कोटी रुपये थेट बँक खात्यांत जमा करण्यात आल्याचे त्यांनी स्पष्ट केले. आंतरराष्ट्रीय बाजारात खतांचे दर गगनाला भिडलेले असतानाही त्याचा कोणताही बोजा शेतकऱ्यांवर पडू न देता परवडणाऱ्या दरात खते देण्यासाठी सरकारने तब्बल १६ लाख कोटी रुपयांचे अनुदान खर्च केले असून, गेल्या १२ वर्षांत गहू आणि धान उत्पादक शेतकऱ्यांना किमान आधारभूत किमतीपोटी २४ लाख कोटी रुपये तर पीक विमा योजनेतून गेल्या दहा वर्षांत २ लाख कोटी रुपयांपेक्षा जास्त नुकसानभरपाई अदा करण्यात आली आहे. सिंचनाचा भार हलका करण्यासाठी पीएम कुसुम योजनेतून १२ लाखांहून अधिक सौरपंप उपलब्ध करून देण्यात आले असून त्यामुळे शेतकऱ्यांची ८० कोटी लिटरहून अधिक डिझेलची बचत झाली असून अतिरिक्त वीजनिर्मितीचाही लाभ मिळत आहे; तसेच बदलत्या हवामानाशी सुसंगत अशा बियाण्यांच्या तीन हजार नव्या जाती विकसित करण्याबरोबरच ग्रामीण अर्थव्यवस्थेचा कणा असलेल्या पशुपालनाला राष्ट्रीय गोकुळ अभियानाद्वारे चालना देऊन लाळ्या-खुरकुत रोगाविरुद्ध देशभर १५० कोटी मोफत लसमात्रा देत ८ कोटींहून अधिक शेतकऱ्यांच्या पशुधनाचे रक्षण केल्याने २०१३-१४ मधील प्रतिदिन सरासरी पाच लिटर दूध उत्पादन आता आठ लिटरवर पोहोचल्याचे त्यांनी नमूद केले. या महत्त्वपूर्ण आर्थिक लाभाच्या घोषणेसोबतच सरदार वल्लभभाई पटेल यांच्या जयंतीनिमित्त ३१ ऑक्टोबर रोजी आयोजित करण्यात येणाऱ्या ‘रन फॉर युनिटी’मध्ये सर्व नागरिकांनी व विशेषतः युवकांनी उत्स्फूर्तपणे सहभागी व्हावे असे आवाहनही प्रधानमंत्री नरेंद्र मोदी यांनी याप्रसंगी केले.
राज्यातील दुष्काळग्रस्त बळीराजाला मोठा दिलासा; पीएम किसान योजनेचे १८३५ कोटी रुपये महाराष्ट्रातील ९१ लाखांहून अधिक शेतकऱ्यांच्या खात्यात जमा
