मुंबई : सणासुदीच्या पार्श्वभूमीवर ग्राहकांच्या आरोग्याशी होणारी खेळखंडोबा रोखण्यासाठी अन्न व औषध प्रशासनाने (एफडीए) मुंबईत धडक तपासणी मोहीम राबवत सात बड्या अन्न आस्थापनांचे परवाने तात्काळ निलंबित केले आहेत. एफडीएचे आयुक्त तुकाराम मुंढे यांच्या आक्रमक भूमिकेनंतर सुरू झालेल्या या कारवाईच्या सत्रात थेट मुंबई महापालिकेच्या नायर रुग्णालयातील कॅन्टीनवरही गंडांतर आले आहे. रुग्ण, त्यांचे नातेवाईक आणि नागरिकांच्या जिवाशी सुरू असलेली हेळसांड आणि अन्न सुरक्षा नियमांचे उघड उल्लंघन समोर आल्यानंतर प्रशासनाने नायरच्या कॅन्टीनचा परवाना निलंबित करण्याचा कठोर निर्णय घेतला.
कुलाब्यातील ऐतिहासिक आणि प्रसिद्ध ऑलिम्पिया कॉफी हाऊसमध्ये ग्राहकांच्या तक्रारींनंतर अचानक टाकलेल्या छाप्यादरम्यान धक्कादायक आणि किळसवाणा प्रकार उघडकीस आला. या ठिकाणी चक्क मूत्रालयाजवळ अन्नसाठा करून ठेवल्याचे पथकाच्या निदर्शनास आले, तर स्वयंपाकघर आणि भांडी घासण्याच्या जागेत अस्वच्छतेचे साम्राज्य पसरले होते. तपासणीदरम्यान रेफ्रिजरेटरमध्ये मांसाहारी रक्ताचे डाग आढळले असून, कच्चे शाकाहारी व मांसाहारी पदार्थ एकत्रच कोंबून ठेवल्याचे निष्पन्न झाले. धक्कादायक बाब म्हणजे, तिथे अन्न हाताळणाऱ्या ३५ कर्मचाऱ्यांपैकी तब्बल ३४ जणांकडे आवश्यक अन्न सुरक्षा प्रशिक्षणाचा अभाव असल्याचे उघड झाले आहे.
या मोहिमेत केवळ हॉटेल्सच नव्हे, तर ऑनलाइन अन्न पुरवठा करणाऱ्या यंत्रणांनाही चाप लावण्यात आला असून चेंबूर येथील ‘ब्लिंक कॉमर्स प्रायव्हेट लिमिटेड’ या क्विक-कॉमर्स डिलिव्हरी सेंटरवर निलंबनाची कारवाई करण्यात आली आहे. याशिवाय घाटकोपरमधील विश्वास स्वीट्स अँड स्नॅक्स आणि ए-१ जनरल अँड ड्राय फ्रूट्स, वरळीचे मिलन पंजाब तसेच मालाड पूर्वेतील सद्गुरू स्वीट्स या आस्थापनांचे परवानेही अन्न सुरक्षेच्या मानकांचे उल्लंघन केल्याप्रकरणी निलंबित करण्यात आले आहेत. या सर्व आस्थापनांवर अन्न सुरक्षा कायद्यान्वये पुढील कायदेशीर कारवाईची प्रक्रिया गतिमान करण्यात आली असून, नियम धाब्यावर बसवून ग्राहकांच्या आरोग्याशी तडजोड करणाऱ्यांची गय केली जाणार नाही, असा सज्जड इशारा एफडीए प्रशासनाने दिला आहे.
