लांजा: अपंगत्वाच्या नैराश्यातून राहत्या घराच्या अंगणात अंगावर रॉकेल ओतून स्वतःला पेटवून घेतलेल्या एका ५८ वर्षीय प्रौढाचा जिल्हा शासकीय रुग्णालयात उपचारादरम्यान मृत्यू झाल्याची हृदयद्रावक घटना घडली आहे. प्रभाकर शंकर रेवाळे (वय ५८, रा. गवाणे रेवाळेवाडी, ता. लांजा) असे मयत व्यक्तीचे नाव असून, या प्रकरणी लांजा पोलीस ठाण्यात अकस्मात मृत्यूची नोंद करण्यात आली आहे.
मिळालेल्या माहितीनुसार, मयत प्रभाकर रेवाळे हे जन्मापासूनच दोन्ही पायांनी दिव्यांग होते. गेल्या काही महिन्यांपासून ते आपल्या या शारीरिक अपंगत्वामुळे तीव्र मानसिक तणावाखाली आणि सतत स्वतःच्याच विचारात अस्वस्थ असायचे. याच मानसिक विवंचनेतून त्यांनी २३ ऑक्टोबर रोजी सकाळी साडेदहा वाजण्याच्या सुमारास राहत्या घरातील रॉकेलचा डबा बाहेर आणला आणि घरासमोरील अंगणात स्वतःच्या अंगावर रॉकेल ओतून काडीपेटीने स्वतःला पेटवून घेतले.
अचानक घडलेल्या या प्रकाराने अंगणात आगीच्या ज्वाळा दिसताच शेजारील ग्रामस्थ आणि नातेवाईकांनी तातडीने धाव घेऊन आग विझवली. गंभीररीत्या भाजलेल्या अवस्थेत त्यांना उपचारासाठी प्रथम लांजा ग्रामीण रुग्णालयात दाखल करण्यात आले. मात्र, त्यांची प्रकृती अत्यंत चिंताजनक असल्याने वैद्यकीय अधिकाऱ्यांनी प्राथमिक उपचार करून अधिक उपचारासाठी त्यांना रत्नागिरीच्या जिल्हा शासकीय रुग्णालयात हलवण्याचा सल्ला दिला. त्यानुसार त्यांना त्याच दिवशी दुपारी रत्नागिरी सिव्हिल हॉस्पिटलच्या अतिदक्षता विभागात दाखल करण्यात आले.
अतिदक्षता विभागात डॉक्टरांचे शर्थीचे प्रयत्न सुरू असतानाच २४ ऑक्टोबर रोजी रात्री नऊ वाजून सात मिनिटांच्या सुमारास त्यांची प्राणज्योत मालवली. कर्तव्यावर असलेल्या वैद्यकीय अधिकाऱ्यांनी तपासणीअंती त्यांना मयत घोषित केले. या घटनेची प्राथमिक माहिती रत्नागिरी शहर पोलिसांकडून लांजा पोलीस ठाण्याला टपालाद्वारे प्राप्त झाल्यानंतर, मयताचे बंधू अनंत सखाराम रेवाळे यांनी दिलेल्या माहितीच्या आधारे लांजा पोलिसांनी भारतीय नागरिक सुरक्षा संहितेच्या कलम १९४ अन्वये अकस्मात मृत्यू रजिस्टर क्रमांक ५८/२०२६ नुसार नोंद केली असून पोलीस पुढील कायदेशीर प्रक्रिया पार पाडत आहेत.
