लांजा (अरबाज नेवरेकर): श्री साई अनिरुद्ध एज्युकेशन सोसायटी, पाली संचलित डि. जे. सामंत इंग्लिश मीडियम प्रशाला आणि लोकमान्य वाचनालय, लांजा यांच्या संयुक्त विद्यमाने १५ ऑक्टोबर रोजी वाचन प्रेरणा दिन विविध उपक्रमांनी उत्साहात साजरा करण्यात आला. यानिमित्त वाचन कट्टा, ग्रंथ प्रदर्शन तसेच सुंदर हस्ताक्षर स्पर्धेतील विजेत्यांचा गौरव करण्यात आला.
कार्यक्रमाला प्रमुख पाहुणे म्हणून लोकमान्य वाचनालयाचे सल्लागार तथा माजी मुख्याध्यापक विजय बेर्डे उपस्थित होते. यावेळी वाचनालयाचे उपाध्यक्ष योगेश वाघधरे, संचालिका भिंगे, ग्रंथपाल रामचंद्र लांजेकर, शुभम नागवेकर, शाळा व्यवस्थापन समितीचे सदस्य देसाई, कामत, सावंत, मुख्याध्यापिका सातपुते यांच्यासह शिक्षक व विद्यार्थी उपस्थित होते.
सुंदर हस्ताक्षर स्पर्धेतील प्राथमिक गटात अवनी कुंभार, अलिजा अहमद, अरसलान नेवरेकर, पाचवी ते सातवी गटात विधी शिंगये, विराज निवळे, ईशा जोशी, तर आठवी ते दहावी गटात स्वरा चरकरी, रचना तांबे, झोया नेवरेकर व अफजा नेवरेकर यांनी अनुक्रमे पारितोषिके पटकावली.
यावेळी स्वरा जोशी, अर्श नेवरेकर, जुवेरिया कासु व अयमन ठाकूर यांनी वाचनाचे महत्त्व आणि डॉ. ए. पी. जे. अब्दुल कलाम यांच्या विचारांवर भाषणे केली. मारिया नेवरेकर हिने ‘किताबे’ ही कविता सादर केली.
प्रमुख पाहुणे विजय बेर्डे यांनी विद्यार्थ्यांना वाचनाचे महत्त्व पटवून देत प्रशालेच्या ग्रंथालयासाठी पुस्तके खरेदी करण्याकरिता एक हजार रुपयांची देणगी दिली. कार्यक्रमाचे सूत्रसंचालन सुकन्या पाध्ये व तन्मयी पाध्ये यांनी केले, तर मुख्याध्यापिका सातपुते यांनी आभार मानले.
