हैदराबाद येथे रत्नागिरी जिल्ह्याचे करणार प्रतिनिधित्व
लांजा(अरबाज नेवरेकर): क्रीडा क्षेत्रात उल्लेखनीय कामगिरी करत न्यू एज्युकेशन सोसायटी, लांजा संचलित न्यू इंग्लिश स्कूल, लांजा येथील दहावीतील विद्यार्थिनी कु. सान्वी सुहास चव्हाण हिने आपल्या यशाची मोहोर उमटवली आहे. उंच उडी या मैदानी क्रीडा प्रकारात उत्कृष्ट कामगिरीच्या जोरावर तिची रत्नागिरी जिल्हा संघात निवड झाली असून, हैदराबाद येथे होणाऱ्या राष्ट्रीय मैदानी स्पर्धेत ती रत्नागिरी जिल्ह्याचे प्रतिनिधित्व करणार आहे.
रत्नागिरी जिल्हा ॲथलेटिक्स असोसिएशनच्या वतीने आयोजित करण्यात आलेल्या मैदानी स्पर्धेत सान्वीने उंच उडी प्रकारात चमकदार कामगिरी केली. तिच्या या कामगिरीची दखल घेत राष्ट्रीय स्पर्धेसाठी जिल्हा संघात तिची निवड करण्यात आली. राष्ट्रीय स्तरावरील स्पर्धेत सहभागी होण्याची संधी मिळणे ही सान्वीसाठी महत्त्वपूर्ण कामगिरी ठरली आहे.
सान्वीच्या या यशाबद्दल न्यू एज्युकेशन सोसायटी, लांजाचे अध्यक्ष, संस्थेचे सर्व संचालक, प्रशालेचे मुख्याध्यापक तसेच सर्व शिक्षकवृंद यांनी तिचे विशेष अभिनंदन करून पुढील वाटचालीस शुभेच्छा दिल्या आहेत.
एका ग्रामीण भागातील विद्यार्थिनीने आपल्या क्रीडाकौशल्याच्या जोरावर जिल्हा स्तरावरून राष्ट्रीय स्पर्धेपर्यंत मजल मारल्याने लांजा तालुक्याच्या शैक्षणिक आणि क्रीडा क्षेत्रात आनंदाचे वातावरण निर्माण झाले आहे. सान्वीच्या या यशाबद्दल तालुक्यातील विविध स्तरांतून तिच्यावर अभिनंदनाचा वर्षाव होत असून, राष्ट्रीय स्पर्धेतही ती यशाची नवी उंची गाठेल, असा विश्वास व्यक्त केला जात आहे.
