पुणे : लोहगडावरून केतन अग्रवाल या तरुणाचा दरीत पडून झालेल्या मृत्यू प्रकरणात एक अत्यंत धक्कादायक वळण समोर आले असून, हा अपघात नसून पूर्वनियोजित कट असल्याचा दावा प्रत्यक्षदर्शीच्या जबाबावरून स्पष्ट होत आहे. प्रत्यक्षदर्शीने दिलेल्या साक्षीत, सियाने खुणावल्यानंतर केतनच्या पायावर लाथ मारली आणि त्याच क्षणी मागून धावत येऊन चेतनने त्याला थेट खोल दरीत ढकलल्याचा थरारक घटनाक्रम उघडकीस आला आहे. हे कृत्य पाहणाऱ्या साक्षीदाराने जाब विचारताच, “जे पाहिलंस ते विसर, नाहीतर तुलाही गडावरून फेकून देईन,” अशी थेट धमकी आरोपीने दिली होती. या भीतीपोटी साक्षीदार काही काळ गप्प राहिला; मात्र प्रकृती अस्वास्थ्यानंतर त्याने स्वतःहून पुढे येत पोलिसांकडे संपूर्ण घटनाक्रम कथन केला.
दुसऱ्या बाजूला, पोलिसांनी या हत्याकांडाचा छडा लावण्यासाठी तांत्रिक तपासावर भर देत संशयितांचे सहा मोबाईल, नऊ पेनड्राइव्ह, सोशल मीडिया खाती आणि बॅकअपमधून तब्बल १२ टीबी डिजिटल डेटा फॉरेन्सिक तपासणीसाठी हस्तगत केला आहे. व्हॉट्सअॅप, इन्स्टाग्राम, स्नॅपचॅट आणि चॅटजीपीटीवरील डिलीट केलेले संभाषण पुन्हा मिळवण्यात पोलिसांना मोठे यश आले असून, पुरावे नष्ट कसे करावेत, चॅट्स कायमस्वरूपी कशी हटवावीत आणि पोलिसांच्या तपासातून कसे सुटावे, याविषयी इंटरनेट व गुन्हेविषयक चित्रपटांवर शोध घेतल्याचे निष्पन्न झाले आहे. सियाने पुरावा नष्ट करण्यासाठी घरात लपवलेला मोबाईल फोडला असला तरी बॅकअपमधून महत्त्वपूर्ण धागेदोरे मिळाले आहेत; तसेच रितेश हंगेच्या मोबाईलमधील संभाषणातून सिया व चेतनसोबत थेट कट रचल्याचे संकेत मिळाले आहेत. सध्या प्रत्यक्षदर्शीचा थेट जबाब आणि तांत्रिक पुरावे यांच्या आधारे पोलीस या संपूर्ण प्रकरणाची कडी जोडत आहेत.
