नवी दिल्ली : मतदार यादीतील एसआयआरचा मुद्दा आणि मुख्य निवडणूक आयुक्त ज्ञानेश कुमार यांच्या राजीनाम्याच्या मागणीसाठी कॉकरोच जनता पार्टीने (CJP) जंतर-मंतर येथे १० ऑक्टोबरला पुकारलेल्या आंदोलनाच्या पार्श्वभूमीवर राजधानी दिल्लीत अभूतपूर्व सुरक्षा व्यवस्था तैनात करण्यात आली आहे. दिल्ली पोलिसांनी या आंदोलनाला अधिकृत परवानगी नाकारली असतानाही संभाव्य गर्दीच्या शक्यतेने केंद्र सरकार आणि पोलिसांनी संयुक्तपणे कडक सुरक्षा उपाययोजना राबवल्या आहेत. दिल्लीच्या सीमांवर अतिरिक्त सुरक्षा दले आणि बीएसएफचे जवान तैनात करण्यात आल्याने तसेच शहरात विविध निर्बंध लादल्यामुळे राजधानीतील वाहतूक व्यवस्था, रेल्वे व मेट्रो सेवा, बाजारपेठा, शैक्षणिक संस्था आणि सामान्य जनजीवनावर मोठा परिणाम झाला आहे. सुरक्षेचा उपाय म्हणून ३८ रेल्वेगाड्या रद्द करण्यात आल्या असून जंतर-मंतर परिसरातील इंटरनेट सेवा शुक्रवार रात्री १० ते शनिवार रात्री १० वाजेपर्यंत तात्पुरती खंडित करण्यात आली आहे; तर मेट्रोच्या तब्बल ४५ स्थानकांचे दरवाजे ९ ऑक्टोबरच्या रात्री ९ ते १० ऑक्टोबरच्या सायंकाळी ६ वाजेपर्यंत बंद ठेवण्याचा निर्णय घेण्यात आला आहे.
कायदा व सुव्यवस्था अबाधित राखण्यासाठी नवी दिल्ली, मध्य दिल्ली आणि सीमावर्ती भागांत २० हजारांहून अधिक सुरक्षा कर्मचारी तैनात करण्यात आले आहेत. आंदोलनाचा केंद्रबिंदू असलेला जंतर-मंतर परिसर, जनपथ, निवडणूक आयोग आणि दिल्ली पोलीस मुख्यालय यांच्या सभोवतालचा सुमारे दीड किलोमीटरचा पट्टा अतिसंवेदनशील क्षेत्र म्हणून घोषित करण्यात आला असून, तिथे एकट्या भागातच ६,५०० हून अधिक बंदोबस्त तैनात करण्यात आला आहे. सुरक्षिततेच्या दृष्टीने नवी दिल्ली परिसराची २० झोनमध्ये विभागणी करण्यात आली असून प्रत्येक झोनची जबाबदारी थेट आयपीएस दर्जाच्या अधिकाऱ्यांकडे सोपवण्यात आली आहे. संवेदनशील ठिकाणांवर सीसीटीव्हीच्या माध्यमातून करडी नजर ठेवली जात असून, परवानगी नसलेल्या या आंदोलनात सहभागी न होण्याचे आवाहन लाऊडस्पीकरद्वारे सातत्याने केले जात आहे.
परवानगी नसताना निदर्शनांसाठी शहरात प्रवेश करणाऱ्या आंदोलकांची धरपकड करण्यासाठी पोलिसांनी १२ तात्पुरती डिटेन्शन सेंटर्स उभारली असून अनधिकृत जमाव जमवणाऱ्यांवर कडक कारवाईचा इशारा देण्यात आला आहे. याशिवाय सामुदायिक केंद्रे, मशिदी आणि रहिवासी कल्याण संघटनांच्या (RWA) माध्यमातून शांततेचे आवाहन केले जात आहे. दुसरीकडे चिल्ला आणि गाझीपूर सीमांवर दिल्ली पोलिसांसह उत्तर प्रदेश पोलीस आणि निमलष्करी दलांची कडेकोट नाकेबंदी करण्यात आली असून प्रत्येक संशयित वाहनाची कसून तपासणी सुरू आहे. रात्री ९ नंतर सीमाभागातील दक्षता अधिक वाढवण्यात आली असून, परिस्थितीचा आढावा घेतल्यानंतरच पुढील निर्बंध शिथिल करण्याचा निर्णय सुरक्षा यंत्रणा घेणार आहेत.
