जाकादेवी /संतोष पवार : रत्नागिरी तालुक्यातील जाकादेवी खालगाव येथील सुप्रसिद्ध मूर्तिकार सुनिल सुरेश जोशी यांच्या गणपती कारखान्याला व प्रसिद्ध सिध्दीविनायक नर्सरीला जाकादेवी प्रशालेतील विद्यार्थ्यांनी अभ्यासाच्या दृष्टीने क्षेत्रभेट देऊन गणपती तयार करण्याच्या संदर्भात व नर्सरीमधील शेकडो वनस्पतींविषयी सविस्तर प्रक्रिया समजावून घेऊन हा उपक्रम यशस्वी केला.
गणपती कारखाना संदर्भात माहिती घेताना गणपती मूर्तीसाठी माती पनवेल येथून आणली जाते. शाडूच्या मातीच्या आधारे गणपती तयार केले जातात .या कारखान्यात ५५० एवढ्या गणेश मूर्ती साकारल्या आहेत. विशेष येथील मूर्तिकार हे गणेशमूर्ती साच्याशिवाय साकारतात. त्यांचे फार मोठे कौशल्य पाहून विद्यार्थी भारावून गेले.या कारखान्यात एक फुटापासून ते साडेपाच फुटापर्यंत गणेश मूर्ती साकारण्याचे कौशल्य सुनिल जोशी करतात. या कारखान्यामुळे परिसरातील होतकरू कलाकारांना हंगामी रोजगार मिळतो. शिवाय गणपती काढताना सेवाभावी वृत्ती आणि मिळणारा आनंद शब्दात व्यक्त करता येणार नाही असेही मूर्तिकार सुनील जोशी यांनी सांगितले.
सिध्दीविनायक नर्सरीला भेट
विद्यालयातील विद्यार्थ्यांनी भौगोलिक दृष्ट्या अभ्यासाच्या दृष्टीने जाकादेवी प्रशालेतील विद्यार्थ्यांनी सिद्धिविनायक नर्सरी जाकादेवी ( गोनबरे ) येथेही निसर्ग क्षेत्रभेटीचे आयोजन करण्यात आले होते. या ठिकाणी नर्सरी स्थापनेपासून ते आजतागायत नर्सरीचे मालक श्री. संतोष गोनबरे यांची यशस्वी वाटचाल या संदर्भात विद्यार्थ्यांनी माहिती संकलित केली.आपल्या भागातील आंबा, काजू, नारळ, चिकू , पेरु,रातांबी विविध प्रकारची फुलझाडे इ. चे महत्त्व किती आर्थिक दृष्ट्या महत्त्वाचे आहे हे सांगून या नर्सरीमध्ये सुमारे १लाखापेक्षा अधिक झाडे असल्याचे नर्सरीचे मालक संतोष गोनबरे यांनी सांगितले. या नर्सरीतील रोपांना ऑनलाइनच्या माध्यमातून कोल्हापूर, सांगली, सातारा, पुणे ,बेंगलोर येथील शेतकरी वर्गाकडून मोठी मागणी असते.विद्यार्थ्यांना स्थानिक नर्सरी तसेच गणपती कारखाना यांची अधिकृत माहिती मिळावी,या उद्देशाने हे उपक्रम राबवण्यात आले होता. आवडती कला व स्वयंरोजगार या दृष्टीने हा उपक्रम विद्यार्थ्यांना अधिक भावला.या उपक्रमाला शाळेतील मुख्याध्यापक नितीन मोरे ,पर्यवेक्षक शाम महाकाळ, ज्येष्ठ शिक्षक अरुण कांबळे, सांस्कृतिक विभाग प्रमुख संतोष पवार, वैभव खानोलकर,क्रीडा शिक्षक किशोर नलवडे, संतोष सनगरे ,हेमराज बहिरम,संदेश सोनवडकर, सौ.अस्मिता आयरे, या शिक्षकांचे उत्तम सहकार्य लाभले. या स्तुत्य उपक्रमांचे शिक्षण संस्थेचे अध्यक्ष सुनिल उर्फ बंधू मयेकर यांनी कौतुक केले.
