सावर्डे-नायशी फाट्यावर एसटी बसची कारला धडक; मुलगी किरकोळ जखमी, चालकाविरोधात गुन्हा दाखल

चिपळूण : मुंबई-गोवा महामार्गावरील सावर्डे पुढील नायशी फाटा येथे एसटी बसने कारला व ट्रेलरला धडक दिल्याने झालेल्या अपघातप्रकरणी एसटी बसचालकाविरोधात चिपळूण पोलिस ठाण्यात गुन्हा दाखल करण्यात आला आहे. या अपघातात कारमधील दहा वर्षीय मुलगी किरकोळ जखमी झाली असून वाहनांचे नुकसान झाले आहे.

हा अपघात १२ सप्टेंबर २०२६ रोजी सकाळी ७.२० वाजण्याच्या सुमारास घडला. अजित तुकाराम सावंत (वय ५०, सध्या रा. कुर्ला, मुंबई; मूळ रा. नडगिवे, ता. कणकवली, जि. सिंधुदुर्ग) हे आपल्या वॅगनआर कार क्रमांक एमएच-०३-एडब्ल्यू-८४६३ मधून मुंबईहून नडगिवे येथे जात होते. सावर्डे पुढील नायशी फाटा येथे आले असता त्यांच्या पाठीमागून येणाऱ्या एसटी बस क्रमांक एमएच-१४-एमएच-६४५० ने त्यांच्या कारला तसेच पुढील ट्रेलरला धडक दिली.

या अपघातात कारचे नुकसान झाले असून कारमध्ये प्रवास करणारी अजित सावंत यांची दहा वर्षीय मुलगी अव्दैता हिला किरकोळ दुखापत झाली. एसटी बसचालक समाधान आण्णा जायभाय (वय ४०, रा. जिजामाता कॉलनी, आजरा गल्ली क्र. ३, कोल्हापूर; मूळ रा. किणी जाफराबाद, जि. जालना) यांच्या निष्काळजीपणामुळे अपघात झाल्याचे फिर्यादीत नमूद करण्यात आले आहे.

याप्रकरणी अजित सावंत यांनी दिलेल्या फिर्यादीवरून १२ सप्टेंबर रोजी दुपारी २.२७ वाजता गुन्हा दाखल करण्यात आला. भारतीय न्याय संहितेतील कलम २८१, १२५(अ) तसेच मोटार वाहन कायदा कलम १८४ अन्वये ही कारवाई करण्यात आली असून, पुढील तपास पोलिस करीत आहेत.