वैभव पवार/गणपतीपुळे : रत्नागिरी येथे संपन्न झालेल्या जिल्हास्तरीय थ्रो बॉल स्पर्धेत जिंदल विद्या मंदिर प्रशालेच्या खेळाडूंनी उत्कृष्ट क्रीडाकौशल्याचे प्रदर्शन करत घवघवीत यश संपादन केले आहे. या स्पर्धेत प्रशालेच्या मुलींच्या तीनही वयोगटांतील संघांनी सहभाग नोंदवून पदकांची कमाई केली. यामध्ये १९ वर्षांखालील मुलींच्या संघाने अंतिम फेरीत धडक मारत प्रथम क्रमांक पटकावला आणि विभागीय स्तरावरील स्पर्धेसाठी आपली निवड निश्चित केली. याशिवाय १४ वर्षे व १७ वर्षे वयोगटातील मुलींच्या संघांनी चमकदार कामगिरी करत आपापल्या गटात द्वितीय क्रमांक पटकावला.
स्पर्धेत उल्लेखनीय यश मिळवणाऱ्या १४ वर्षांखालील संघात स्वरा राजवाडकर, वेदा खामकर, आराध्य महाडिक, मनस्वी आवटी, श्री जोशी, भूमी पाष्टे, रिमा सुर्वे, शुभ्रा गोताड, तनिष्का खाडे, त्रिशा चौघुले, सारिया सय्यद व अक्षरा आढाव यांचा समावेश होता. १७ वर्षांखालील संघात अस्मी हळदणकर, गार्गी घनवटकर, निधी गडदे, अनन्या गद्रे, आझमीना सांगरे, मुग्धा घाडगे, काव्य वर्मा, देवर्षी कासार, अलीना मालदार, त्रिशा गुरव, अर्जया थोरात व वफा राजवाडकर यांनी उत्कृष्ट खेळ केला. तसेच प्रथम क्रमांक मिळवून विभागीय स्तरावर झेप घेणाऱ्या १९ वर्षांखालील संघात रिद्धी पाटील, मानसी घाटगे, अमरीन शेख, वैशाली बेळगावकर, झिया संसारे, अनुष्का खारवटकर, भक्ती दुर्गवली, अदिती फोटफोडे, अक्षरा निकम, वैदेही दुर्गवळी, सारा सोलकर व अदिती आढाव यांनी सहभाग घेतला होता.
विद्यार्थ्यांच्या या यशाबद्दल शाळेच्या मुख्याध्यापिका सौ. सोनिया सेठी यांनी सर्व विजेत्या खेळाडूंचे विशेष कौतुक करत त्यांना पुढील वाटचालीस शुभेच्छा दिल्या. या सर्व खेळाडूंना शाळेचे क्रीडा शिक्षक रणजित जाधव, मिथिला मोरे, आदित्य पवार व रोहित यांचे बहुमूल्य मार्गदर्शन लाभले. प्रशालेतील सर्व शिक्षकवृंद, शिक्षकेतर कर्मचारी व पालकांनी सर्व गुणवंत खेळाडूंचे मनःपूर्वक अभिनंदन केले आहे.
