चिपळूण (वार्ताहर): गोवळकोट परिसरातील लहान मुलांना आणि खेळाडूंना खेळण्यासाठी मोकळी जागा उपलब्ध व्हावी या हेतूने गोवळकोट धक्का येथील मैदानाची तातडीने साफसफाई करण्यात यावी, अशी आग्रही मागणी स्थानिक नगरसेविका मिसबाह नाखुदा यांनी लावून धरली होती. त्यांच्या या मागणीची तातडीने दखल घेत चिपळूण नगरपालिकेचे आरोग्य सभापती शुभम पिसे यांनी स्वतः गोवळकोट धक्का येथील मैदानाची प्रत्यक्ष पाहणी केली. सभापतींच्या या पाहणी दौऱ्यानंतर आता नगरपालिकेच्या आरोग्य विभागामार्फत या परिसरातील मैदानाची स्वच्छता आणि नाले सफाईच्या कामालाही मोठा वेग येणार आहे.
सध्या गोवळकोट भागातील शिंदेवाडी येथील मैदानामध्ये स्वच्छता मोहीम युद्धपातळीवर सुरू आहे. हे काम पूर्ण होताच शिंदेवाडी मैदानापाठोपाठ गोवळकोट धक्का येथील मैदानाची स्वच्छताही प्राधान्याने आणि लवकरात लवकर पूर्ण करून घेतली जाईल, असा ठाम शब्द आरोग्य सभापती शुभम पिसे यांनी यावेळी दिला. या संयुक्त पाहणी दौऱ्याच्या वेळी आरोग्य सभापती शुभम पिसे यांच्यासह नगरसेविका मिसबाह नाखुदा, पालिकेचे आरोग्य विभाग प्रमुख वैभव निवाते, आरोग्य निरीक्षक सुजित जाधव आणि संदेश किंजलकर आदी अधिकारी व मान्यवर प्रत्यक्ष उपस्थित होते.
