दिल्ली: फ्लायदुबईच्या तेल अवीवकडे जाणाऱ्या विमानातील कॉकपिटमध्ये हल्ला केल्याचा आरोप असलेल्या ओमानी सहवैमानिकाला सौदी अरेबियाने संयुक्त अरब अमिरातीच्या (यूएई) ताब्यात दिले आहे.
तपास यंत्रणा आता ही घटना विमान जाणूनबुजून कोसळवण्याचा प्रयत्न होता का, याचा तपास करत आहेत. अमिराती सरकारने सांगितले की, त्यांची टीम या हल्ल्याची चौकशी करत असून या घटनेचा कोणत्याही दहशतवादी हेतूशी संबंध आहे का, याचाही तपास केला जात आहे.
फ्लायदुबईचे एफझेड१०७३ हे विमान दुबईहून तेल अवीवकडे जात होते. या विमानात सुमारे १८२ प्रवासी होते. उड्डाणादरम्यान ओमानी सहवैमानिकाने भारतीय कॅप्टन स्मिट मच्छर यांच्यावर चाकूने हल्ला केला आणि विमानाचा ताबा घेण्याचा प्रयत्न केला. जखमी झाल्यानंतरही कॅप्टन मच्छर यांनी कॉकपिटचा दरवाजा उघडला. त्यानंतर प्रवासी आणि क्रू सदस्यांनी कॉकपिटमध्ये प्रवेश करून सहवैमानिकाला ताब्यात घेतले.
या घटनेदरम्यान विमानाची उंची सुमारे ३३ हजार फूटांवरून वेगाने १७ हजार फूटांपर्यंत खाली आली. त्यानंतर सौदी अरेबियातील तबूक विमानतळावर विमानाचे आपत्कालीन लँडिंग करण्यात आले. कॅप्टन मच्छर यांच्यावर सध्या अबू धाबी येथे उपचार सुरू असून त्यांची प्रकृती स्थिर असल्याचे सांगण्यात येत आहे. हे विमान यूएईमध्ये नोंदणीकृत असल्याने यूएईने या प्रकरणाचा तपास आपल्या ताब्यात घेतला आहे. तपासादरम्यान दहशतवादी हेतू किंवा मानसिक विकारासह सर्व शक्यतांचा विचार केला जात आहे.
इस्रायलचे पंतप्रधान बेंजामिन नेतन्याहू यांनी सांगितले की, प्राथमिक तपासात सहवैमानिकावर इस्लामी कट्टरतावादी विचारसरणीचा प्रभाव असल्याचे दिसून येत आहे आणि त्याची वर्तणूक आत्मघातकी स्वरूपाची होती.
अमेरिकेचे राष्ट्राध्यक्ष डोनाल्ड ट्रम्प यांनीही या घटनेचा संभाव्य इराणशी संबंध असल्याचा उल्लेख केला आहे. मात्र, नेतन्याहू यांनी अद्याप हा संबंध सिद्ध झालेला नसल्याचे स्पष्ट केले आहे. सहवैमानिकाची अधिकृत ओळख अद्याप जाहीर करण्यात आलेली नाही. इस्रायलही या तपासात सहभागी आहे.
