नेपाळच्या पूरग्रस्तांसाठी अमेरिकेची ३१ दशलक्ष डॉलरची मदत जाहीर ; पूल, निवारा आणि ड्रोनसाठी निधी

काठमांडु: अमेरिकेने नेपाळसाठी ३१ दशलक्ष अमेरिकी डॉलरच्या निधीची घोषणा केली आहे. या मदतीचा उपयोग पूरग्रस्त भागांमध्ये पूल उभारणे, बाधित समुदायांच्या नागरी गरजा पूर्ण करणे तसेच भविष्यात आपत्तीनंतरच्या मदतकार्यात ड्रोन तैनात करण्यासाठी केला जाणार आहे.राजकीय व्यवहार विभागाच्या अवर परराष्ट्र सचिव अॅलिसन हूकर यांनी मंगळवारी न्यूयॉर्कमध्ये संयुक्त राष्ट्र महासभेच्या अधिवेशनादरम्यान नेपाळचे परराष्ट्रमंत्री शिशिर खनाल यांची भेट घेतल्यानंतर ही घोषणा केली.

अमेरिकेच्या परराष्ट्र विभागाने जारी केलेल्या निवेदनानुसार, हूकर यांनी नेपाळमध्ये आलेल्या विनाशकारी पुरामुळे प्रभावित झालेल्या सर्व नागरिकांप्रति, तसेच बेपत्ता असलेल्या सुमारे ७० अमेरिकन नागरिकांच्या कुटुंबीयांप्रति संवेदना व्यक्त केल्या.

बैठकीदरम्यान हूकर यांनी काँग्रेसच्या सहकार्याने कायमस्वरूपी आणि विशेष पद्धतीने बांधण्यात येणाऱ्या पुलांसाठी १० दशलक्ष अमेरिकी डॉलरचा निधी उपलब्ध करून देण्याची योजना जाहीर केली. हे पूल अमेरिकेतील एका कंपनीकडून तयार करून घेतले जाणार आहेत. या पुलांमुळे पूरग्रस्त भागातील महत्त्वाची वाहतूक व्यवस्था पुन्हा सुरळीत होण्यास मदत होईल आणि प्रादेशिक संपर्कव्यवस्था मजबूत होईल, असे निवेदनात म्हटले आहे.

अवर सचिवांनी बाधित समुदायांसाठी पाणी, स्वच्छता आणि साफसफाईच्या सुविधा, तसेच निवारा, सुरक्षा, उपजीविका आणि हिवाळ्यातील गरजा पूर्ण करण्यासाठी अतिरिक्त ८ दशलक्ष अमेरिकी डॉलरची मदत देण्याची योजनाही जाहीर केली.भविष्यातील आपत्ती निवारण कार्याला अधिक प्रभावीपणे मदत करण्यासाठी अमेरिकेत निर्मित १३ दशलक्ष अमेरिकी डॉलर किमतीचे ड्रोन उपलब्ध करून देण्याचीही अमेरिकेची योजना आहे.या निधीच्या घोषणेनंतर नेपाळमधील पूरग्रस्तांसाठी मदत आणि पुनर्बांधणीच्या प्रयत्नांसाठी अमेरिकेकडून देण्यात येणारी एकूण मदत ३६ दशलक्ष अमेरिकी डॉलरपेक्षा अधिक झाली आहे.

अमेरिकेने नेपाळ सरकारसोबत समन्वयाने काम सुरू ठेवणार असल्याचे निवेदनात म्हटले आहे. ज्या भागांना सर्वाधिक मदतीची गरज आहे, तेथे अतिरिक्त मदत निश्चित करून ती पोहोचवण्यासाठी अमेरिका नेपाळ सरकारसोबत सहकार्य करणार आहे.२६ ऑगस्ट रोजी तिबेटच्या सीमेला लागून असलेल्या नेपाळमधील रसुवागढी भागात आलेल्या विनाशकारी पुरात किमान १,४५१ जणांचा मृत्यू झाला असून ६,००० हून अधिक जण बेपत्ता आहेत.