संगमेश्वर: आधीच दुष्काळग्रस्त घोषित झालेल्या संगमेश्वर तालुक्यात एकीकडे निसर्गाच्या लहरीपणामुळे पिके जगवण्यासाठी बळीराजाला पराकोटीचा संघर्ष करावा लागत असताना, दुसरीकडे शासनाच्या ऑनलाइन पीक पाहणी प्रणालीतील तांत्रिक त्रुटींनी शेतकऱ्यांचे जगणे अधिकच मुश्कील केले आहे. सर्वे नंबर अचूक नोंदवूनही प्रणालीमध्ये भलताच सातबारा दाखवला जात असल्याच्या गंभीर तक्रारी शेतकऱ्यांमधून समोर येत असून, या डिजिटल गोंधळामुळे दुष्काळी परिस्थितीत शेतकऱ्यांमध्ये प्रचंड अस्वस्थता व संताप पसरला आहे.
तालुक्यात यंदा सुमारे ८ हजार २८२ हेक्टर क्षेत्रावर भाताची लागवड करण्यात आली असून, हे प्रमाण गेल्या वर्षाच्या तुलनेत जवळपास स्थिर आहे. मात्र, नाचणीच्या क्षेत्रात यंदा वाढ झाली असून, गेल्या वर्षीचे १०० हेक्टरचे क्षेत्र वाढून यंदा १२०.७६ हेक्टरवर पोहोचले आहे. दुष्काळाच्या सावटाखाली असताना शासकीय मदत आणि नुकसानभरपाईसाठी पीक पाहणीची अचूक नोंद होणे अत्यंत कळीचे ठरले आहे. असे असतानाही, ऑनलाइन पीक नोंदणी करताना प्रणालीमध्ये वारंवार व्यत्यय येणे, प्रक्रिया वेळेत पूर्ण न होणे आणि प्रत्यक्षात शेतात असलेले पीक व स्क्रीनवर दिसणारी माहिती यात तफावत निर्माण होत असल्याने शेतकऱ्यांचा बहुमूल्य वेळ आणि श्रम वाया जात आहेत.
या सर्व गंभीर अडचणींकडे लक्ष वेधत, प्रत्यक्ष शेतातील पीक आणि ऑनलाइन नोंदणी यात मोठी तफावत राहून शेतकरी शासकीय लाभापासून वंचित राहू नयेत, यासाठी संबंधित यंत्रणेने तात्काळ या तांत्रिक दोषांचे निवारण करावे, अशी मागणी शेतकरी बंड्या लिंगायत यांनी केली आहे. तर दुसरीकडे, संगमेश्वरमधील भीषण दुष्काळी परिस्थिती आणि इंटरनेट वा सर्व्हरचे अडथळे लक्षात घेता, प्रशासनाने ऑनलाइनच्या हट्टाऐवजी आवश्यकतेनुसार तातडीने ऑफलाइन पीक पाहणीची सुविधाही खुली करून द्यावी, अशी आग्रही मागणी प्रगतिशील शेतकरी रवींद्र उर्फ नाना हळबे यांनी प्रशासनाकडे केली आहे.
