दाभोळे/सिकंदर फरास : बऱ्याच दिवसांच्या मोठ्या खंडानंतर आज दुपारनंतर दाभोळे आणि आजूबाजूच्या परिसरात पावसाने अखेर हजेरी लावली. दुपारनंतर अचानक आकाशात काळे ढग दाटून आले आणि गडगडाटासह पावसाच्या हलक्या सरी बरसू लागल्या. मागील काही दिवसांपासून कडक ऊन आणि उकाड्याने नागरिक त्रस्त झाले होते. तडकत्या उन्हाच्या झळा अंगाला अक्षरशः झोंबत असताना, या रिमझिम पावसामुळे वातावरणामध्ये गारवा निर्माण झाला असून नागरिकांना मोठा दिलासा मिळाला आहे.
मात्र दुसरीकडे समाधानकारक पाऊस न पडल्यामुळे शेतकरी वर्गामध्ये चिंतेचे वातावरण पाहायला मिळत आहे. या वर्षी पावसाळा सुरू झाल्यापासून हवा तसा पाऊस झालेला नाही. परिणामी, शेतात लावलेली भाताची रोपे पाण्याअभावी आणि तीव्र उन्हामुळे आता सुकण्याच्या व करपण्याच्या मार्गावर आली आहेत. शेतकरी वर्गाने पिकासाठी घेतलेली मेहनत व खर्च वाया जातो की काय अशी भीती बळीराजासमोर आहे.
याशिवाय पावसाचे प्रमाण अत्यंत कमी राहिल्याने परिसरातील जलस्त्रोतांमध्ये पाहिजे तेवढा पाणीसाठा जमा झालेला नाही. यामुळे आगामी काळात पिण्याच्या पाण्याचा गंभीर प्रश्न निर्माण होण्याची दाट शक्यता आहे.
