रत्नागिरी : शहरातील अत्यंत वर्दळीच्या मानल्या जाणाऱ्या एस.टी. स्टँड ते भगवती बंदर जाणाऱ्या मुख्य रस्त्यावर मांडवी भुते नाका चौकात एक धक्कादायक अपघात घडला आहे. पतीसोबत पायी रस्ता ओलांडत असलेल्या एका महिलेला भरधाव वेगाने आलेल्या अज्ञात ॲक्टिव्हास्वाराने जोरदार धडक दिली. या अपघातात पादचारी महिला गंभीर जखमी झाली असून, धडक दिल्यानंतर दुचाकीस्वार घटनास्थळावरून पसार झाला आहे. याप्रकरणी रत्नागिरी शहर पोलीस ठाण्यात अज्ञात वाहनचालकाविरुद्ध गुन्हा दाखल करण्यात आला आहे.
मिळालेल्या माहितीनुसार, नाचणे येथील गोडावून स्टॉपजवळील गणराज रेसिडेन्सी (फ्लॅट नं. १०२, विनम्र नगर) येथे राहणाऱ्या सविता सुधीर चव्हाण (वय ५४, गृहिणी) या २६ सप्टेंबर रोजी रात्री साडेआठच्या सुमारास पती सुधीर चव्हाण यांच्यासह दुचाकीने (क्र. एम.एच. ०८ ए.डी. २३४६) मांडवी येथे गेल्या होत्या. तेथील रहाटघर पेट्रोल पंपावर त्यांनी आपली दुचाकी उभी केली आणि दोघेही पायी चालत जात होते. मांडवी भुते नाका येथील चौकात रस्ता ओलांडत असताना भगवती बंदराकडून रत्नागिरी एस.टी. स्टँडच्या दिशेने अतिशय वेगात आलेल्या एका ॲक्टिव्हासारख्या दिसणाऱ्या दुचाकी चालकाने रस्त्याची परिस्थिती लक्षात न घेता हयगयीने व निष्काळजीपणाने वाहन चालवून सविता चव्हाण यांना थेट जोरदार धडक दिली. या भीषण धडकेत सविता चव्हाण या रस्त्यावर आदळून गंभीर जखमी झाल्या.
अपघातानंतर जखमी सविता चव्हाण यांच्यावर तात्काळ उपचार करण्यात आले. यानंतर त्यांनी दिलेल्या फिर्यादीवरून रत्नागिरी शहर पोलिसांनी अज्ञात ॲक्टिव्हा चालकाविरुद्ध भारतीय न्याय संहिता २०२३ चे कलम २८१, १२५ (अ) आणि मोटार वाहन कायद्याच्या कलम १८४ अन्वये गुन्हा दाखल केला आहे. मांडवी ते एस.टी. स्टँड परिसरातील सीसीटीव्ही फुटेजच्या आधारे धडक देऊन पसार झालेल्या दुचाकीस्वाराचा शोध रत्नागिरी शहर पोलीस घेत आहेत.
