रत्नागिरी: जिल्ह्यातून दोन वेगवेगळ्या घटनांमध्ये एक महिला व एक युवक बेपत्ता झाल्याची नोंद झाली आहे. मंडणगड तालुक्यातील तिडे आदिवासीवाडी येथून ५६ वर्षीय महिला, तर रत्नागिरी तालुक्यातील खेडशी येथून २६ वर्षीय युवक अचानक बेपत्ता झाले असून, या दोघांचा शोध घेण्यासाठी पोलिसांनी नागरिकांना सहकार्याचे आवाहन केले आहे.
मंडणगड तालुक्यातील तिडे आदिवासीवाडी येथील रहिवासी ताई शांताराम जाधव (वय ५६) या गेल्या २७ ऑगस्ट रोजी दुपारी तीन वाजण्याच्या सुमारास घरातून अचानक निघून गेल्या. त्या अद्याप घरी परतलेल्या नसून नातेवाइकांनी सर्वत्र शोध घेऊनही त्यांचा ठावठिकाणा लागलेला नाही. त्यांचा वर्ण निमगोरा, चेहरा गोल, डोळे काळे, सरळ नाक आणि उंची सुमारे ४ फूट ३ इंच आहे. घरातून निघताना त्यांनी लाल रंगाची साडी आणि पिवळ्या बारीक फुलांची नक्षी असलेला ब्लाऊज परिधान केला होता, तसेच त्यांच्या गळ्यात काळ्या मण्यांचे मंगळसूत्र आहे. या महिलेबाबत कोणासही काही माहिती मिळाल्यास तात्काळ मंडणगड पोलीस ठाण्याशी संपर्क साधावा, असे पोलिसांनी कळवले आहे.
दुसऱ्या एका घटनेत, रत्नागिरी तालुक्यातील खेडशी, मोरया एकतानगर येथील सुयोग उत्तम कोलगे (वय २६) हा युवक २० ऑगस्ट रोजी दुपारी चार वाजता घरातून बाहेर पडला तो अद्याप परतलेला नाही. सुयोग याचा बांधा बारीक असून उंची ५ फूट ३ इंच, वर्ण गोरा, चेहरा उभा आणि चेहऱ्यावर दाढी-मिशा आहेत. घराबाहेर पडताना त्याने निळ्या रंगाचा फुलांचा टी-शर्ट आणि निळी फुल जीन्स परिधान केली होती. तसेच त्याच्याकडे मोटो कंपनीचा टॅब, आयफोन मोबाईल आणि मरून रंगाची ॲक्टिव्हा दुचाकी (क्रमांक MH 08 AH 4237) आहे. या युवकाविषयी काहीही सुगावा लागल्यास नागरिकांनी तात्काळ रत्नागिरी ग्रामीण पोलीस ठाण्याशी संपर्क साधावा, असे आवाहन पोलीस प्रशासनाकडून करण्यात आले आहे.
