रत्नागिरी: जागतिक ज्येष्ठ नागरिक दिनाचे औचित्य साधून रत्नागिरी जिल्ह्यात ज्येष्ठांच्या सन्मानार्थ, कल्याणासाठी आणि सर्वांगीण सुरक्षेसाठी समाजकल्याण विभागासह विविध यंत्रणांच्या वतीने व्यापक प्रबोधनात्मक उपक्रमांची आखणी करण्यात आली आहे. समाजातील प्रत्येक घटकामध्ये ज्येष्ठांप्रती आदराची व कृतज्ञतेची भावना रुजवण्यासाठी हा उपक्रम हाती घेण्यात आला असून, अडचणीच्या काळात ज्येष्ठांनी शासनाच्या ‘१४५६७’ या राष्ट्रीय हेल्पलाईन क्रमांकाचा आधार घ्यावा, असे आवाहन समाजकल्याण विभागाचे सहाय्यक आयुक्त सोनटक्के यांनी केले आहे.
नव्या पिढीला ज्येष्ठांचे महत्त्व आणि मूल्यांची ओळख व्हावी या उद्देशाने जिल्ह्यातील सर्व शाळा आणि महाविद्यालयांमध्ये ‘आजोबा-आजी, शिक्षक व मुले’ (GPTM) विशेष बैठकांचे आयोजन करण्यात येत आहे. यासोबतच शासकीय वसतिगृहांतील विद्यार्थ्यांमार्फत पदपथ व प्रभातफेऱ्या काढून सामाजिक जनजागृती केली जाणार असून, विद्यार्थ्यांना ज्येष्ठांचा आदर करण्याची सामूहिक शपथही दिली जाणार आहे.
आरोग्य संवर्धनाच्या दृष्टीने जिल्हा शासकीय रुग्णालयाच्या संयुक्त विद्यमाने खेडशी येथील ‘माहेर संस्था’ तसेच लांजा तालुक्यातील कुर्वे येथील ‘भाकर संस्था’ संचलित वृद्धाश्रमांमध्ये मोफत आरोग्य तपासणी शिबिरे राबवली जात आहेत. याशिवाय, वाढत्या सायबर फसवणुकीपासून संरक्षण मिळण्यासाठी आणि कायदेविषयक हक्कांची जाणीव करून देण्यासाठी पोलीस व विधी विभागाच्या वतीने विशेष मार्गदर्शन सत्रे घेतली जाणार आहेत. या सत्रांतून ज्येष्ठ नागरिकांना त्यांचे हक्क आणि शासकीय कल्याणकारी योजनांची सविस्तर माहिती दिली जाणार आहे.
