संगमेश्वर: कोकण रेल्वे मार्गावरील संगमेश्वर रोड रेल्वे स्थानकाने अवघ्या सहा महिन्यांत सुमारे साडेतीन कोटी रुपयांचा महसूल मिळवून दिला असून एकट्या गणेशोत्सवाच्या कालावधीत स्थानकाला तब्बल ९५ लाख रुपयांचे उत्पन्न मिळाले आहे. प्रवाशांचा प्रचंड प्रतिसाद आणि विक्रमी महसूल मिळवून देणाऱ्या या स्थानकावर मात्र अद्याप चार महत्त्वाच्या साप्ताहिक एक्स्प्रेस गाड्यांना थांबा मिळालेला नसल्याने संगमेश्वर तालुकावासीयांसह कोकणातील प्रवाशांमधून तीव्र नाराजी व्यक्त केली जात आहे. कोट्यवधींचे उत्पन्न देऊनही हक्काच्या रेल्वे थांब्यासाठी प्रवाशांना ताटकळत राहावे लागत असल्याचे विदारक चित्र सध्या निर्माण झाले आहे.
संगमेश्वर परिसरातील प्रवाशांच्या सोयीसाठी बांद्रा–मडगाव एक्स्प्रेस (१०११५/१०११६), श्री गंगानगर–तिरुवनंतपुरम एक्स्प्रेस (१६३११/१६३१२), अजमेर–एर्नाकुलम मरुसागर एक्स्प्रेस (१२९७७/१२९७८) आणि जबलपूर–कोईम्बतूर एक्स्प्रेस (०२१९७/०२१९८) या चार प्रमुख लांब पल्ल्याच्या गाड्यांना संगमेश्वर रोड स्थानकावर थांबा मंजूर करावा, अशी प्रवाशांची जुनी आणि आग्रही मागणी आहे. यासंदर्भात कोकण रेल्वे प्रशासनाने रेल्वे बोर्डाकडे सकारात्मक प्रस्ताव सादर केला आहे. या मागणीला पाठबळ देण्यासाठी मुख्यमंत्री देवेंद्र फडणवीस, सांस्कृतिक कार्यमंत्री आशिष शेलार, आमदार शेखर निकम, आमदार प्रमोद जठार, पद्मश्री दादा इदाते आणि भाजपचे जिल्हाध्यक्ष प्रशांत यादव यांनीही रेल्वे प्रशासनाकडे पाठपुरावा केला आहे. तसेच पद्मश्री गजानन माने यांनी थेट कोकण रेल्वेचे व्यवस्थापकीय संचालक संतोष कुमार झा यांच्याशी झालेल्या बैठकीत हा प्रश्न मांडला होता.
संगमेश्वर तालुक्यातील अनेक दुर्गम गावांसाठी हे रेल्वे स्थानक मुख्य केंद्र असल्याने या गाड्यांचे थांबे प्रवाशांच्या दृष्टीने अत्यंत आवश्यक बनले आहेत. या थांब्यांसाठी सातत्याने पाठपुरावा सुरू असून लवकरच यश मिळेल, असा विश्वास निसर्गरम्य चिपळूण/संगमेश्वर ग्रुपचे प्रमुख संदेश जिमन यांनी व्यक्त केला आहे. आता रेल्वे बोर्ड या जनभावनेचा आदर करून सकारात्मक निर्णय कधी घेते आणि संगमेश्वरकरांची थांब्यांची प्रतीक्षा कधी संपते, याकडे संपूर्ण तालुक्याचे लक्ष लागले आहे.
