संगमेश्वर: वयोवृद्ध महिलेचा सांभाळ करावा लागतो आणि त्यामुळे स्वतःला कुठेही फिरायला जाता येत नाही या क्षुल्लक रागातून ९१ वर्षांच्या वृद्ध महिलेला लाकडी बांबूने व लाथाबुक्क्यांनी बेदम मारहाण केल्याची संतापजनक घटना संगमेश्वर तालुक्यातील नायरी येथे घडली आहे. या मारहाणीत वृद्ध महिलेच्या हात, पाय आणि गुडघ्याला गंभीर दुखापती झाल्या असून, याप्रकरणी नाशिरा अस्लम मोडक (रा. नायरी, ता. संगमेश्वर) या महिलेविरोधात गुन्हा दाखल करण्यात आला आहे.
मिळालेल्या माहितीनुसार, नवी मुंबईतील सीवूड्स, नेरूळ येथे वास्तव्यास असलेल्या जैबुन्निसा निजामउद्दीन लांबे (वय ६०) यांची आई जलेखा इसाक मोडक (वय ९१) या संगमेश्वर तालुक्यातील नायरी येथे राहतात. वय अत्यंत जास्त असल्याने जलेखा मोडक यांना दैनंदिन देखभालीसाठी आधार लागतो. मात्र, वृद्धेचा सांभाळ करावा लागत असल्यामुळे आपल्याला घराबाहेर कुठेही जाता येत नाही, या रागातून आरोपी नाशिरा मोडक हिने २५ ऑक्टोबर २०२६ रोजी सायंकाळी चार ते साडेपाच वाजण्याच्या सुमारास राहत्या घरात वृद्धेशी वाद घातला. त्यानंतर रागाच्या भरात तिने हातातील लाकडी बांबूने आणि लाथाबुक्क्यांनी जलेखा मोडक यांना अमानुष मारहाण केली. या मारहाणीत वृद्धेचा उजवा गुडघा, डावा पाय आणि उजव्या मनगटाला लहान-मोठ्या गंभीर जखमा झाल्या.
या दुर्दैवी घटनेची माहिती मिळताच जखमी वृद्धेच्या मुलीने नवी मुंबईतील सीबीडी बेलापूर पोलीस ठाण्यात धाव घेऊन तक्रार नोंदवली. तेथे सुरुवातीला शून्य क्रमांकाने दाखल झालेला हा गुन्हा सीसीटीएनएस प्रणालीद्वारे संगमेश्वर पोलिसांकडे वर्ग करण्यात आला. त्यानंतर १ नोव्हेंबर रोजी मध्यरात्री संगमेश्वर पोलीस ठाण्यात भारतीय न्याय संहिता (बीएनएस) २०२३ च्या कलम ११५(२) आणि ११८(१) अन्वये गुन्हा नोंदवण्यात आला असून, पोलीस या प्रकरणाचा पुढील तपास करत आहेत. एका अतिवृद्ध महिलेवर झालेल्या या क्रूर मारहाणीमुळे परिसरामध्ये तीव्र संताप व्यक्त केला जात आहे.
