रत्नागिरी: जिल्ह्यात निसर्गाच्या लहरीपणाचा मोठा फटका सर्वसामान्य नागरिकांसह बळीराजाला बसत असून, एकाच वेळी ऊन आणि पावसाच्या विचित्र खेळामुळे संपूर्ण जिल्हा दुहेरी संकटात सापडला आहे. गेल्या काही दिवसांपासून पावसाने अचानक दांडी मारल्याने पावसाळ्यातच उन्हाळ्यासारखी दाहकता निर्माण झाली होती. दिवसभर वाढलेला उकाडा आणि कडक ऊन यामुळे हैराण नागरिकांना घराबाहेर पडताना छत्री, रुमाल आणि गॉगलचा आधार घ्यावा लागत होता. रविवारी केवळ हलक्या सरींवर हुलकावणी देणाऱ्या पावसाने बुधवारी मात्र दमदार हजेरी लावत अचानक वातावरण बदलले. कडक ऊन, ढगाळ आकाश आणि अनपेक्षित सरी अशा सतत बदलणाऱ्या हवामानामुळे सध्या जिल्ह्यात साथीच्या आजारांची नांदी झाली आहे.
वातावरणातील या टोकाच्या बदलांचा थेट आणि विपरित परिणाम लहान मुलांपासून ते ज्येष्ठ नागरिकांपर्यंत सर्वांच्याच आरोग्यावर जाणवू लागला आहे. सध्या सर्दी, खोकला, ताप, अंगदुखी आणि डोकेदुखी यांसारख्या तक्रारी घेऊन उपचारासाठी येणाऱ्या रुग्णांची संख्या दिवसेंदिवस झपाट्याने वाढत आहे. परिणामी जिल्हा रुग्णालय, प्राथमिक आरोग्य केंद्रे आणि खासगी रुग्णालयांतील बाह्यरुग्ण विभागांमध्ये (ओपीडी) सकाळपासूनच तपासणीसाठी नागरिकांच्या लांबलचक रांगा पाहायला मिळत आहेत. रुग्णालयांसोबतच औषध दुकानांमध्येही औषधोपचारासाठी नागरिकांची सततची ये-जा सुरू असल्याचे चित्र आहे. कोणतीही लक्षणे अंगावर न काढता नागरिकांनी स्वतःहून काळजी घ्यावी आणि वेळेवर वैद्यकीय सल्ला घ्यावा, असे आवाहन आता आरोग्य विभागाकडून करण्यात येत आहे.
दुसऱ्या बाजूला शेती क्षेत्रातही हवामानाच्या या खेळामुळे अनिश्चिततेचे सावट निर्माण झाले आहे. दरवर्षी सरासरी सुमारे ३५०० मिलिमीटर पाऊस पडणाऱ्या या जिल्ह्यात यंदा जुलै महिन्यात झालेल्या दमदार पावसामुळे शेतकऱ्यांनी भात आणि नाचणीच्या लावणी-पेरणीची कामे वेळेत आटोपली होती. मात्र पिके जोमात असतानाच पावसाने दीर्घ विश्रांती घेतल्याने शेतातील भातासह इतर पिकांना तातडीने पाण्याची तीव्र गरज भासू लागली होती. बुधवारी झालेल्या जोरदार पावसामुळे पिकांना जीवनदान मिळून शेतकरी काहीसा सुखावला असला, तरी वाढता उकाडा, पावसाची अनिश्चितता आणि बदलत्या हवामानाने निर्माण झालेले आरोग्याचे प्रश्न यामुळे जिल्ह्यासमोरचे संकट अद्याप कायम आहे.
