रत्नागिरी : रत्नागिरी जिल्ह्यात पावसाचा हंगाम अधिकृतरीत्या संपण्याआधीच नागरिकांना तीव्र उकाड्याचा आणि कडक उन्हाचा सामना करावा लागत असून सप्टेंबर महिन्यामध्येच ‘ऑक्टोबर हीट’चे चटके बसू लागले आहेत. जून ते सप्टेंबर या चार महिन्यांच्या कालावधीत जिल्ह्यात सातत्याने हजेरी लावणारा पाऊस यंदा सुरुवातीपासूनच गायब राहिल्याने संपूर्ण पावसाळा कोरडा गेला आहे. सप्टेंबरच्या शेवटच्या आठवड्यापर्यंत पावसाची उपस्थिती अपेक्षित असताना, तिसऱ्या आठवड्यातच हलक्या सरी वगळता पावसाने पूर्णपणे दडी मारली आहे. याचा थेट परिणाम तापमानावर झाला असून कमाल तापमानासोबतच किमान तापमानातही २.५ ते ३ अंशांची वाढ नोंदवली गेली आहे. साधारणपणे या महिन्यात २९ ते ३० अंश सेल्सिअस असणारे कमाल तापमान यंदा थेट ३२ ते ३३ अंशांवर पोहोचले आहे, तर २३ ते २४ अंशांवर राहणारे किमान तापमान २६.५ अंशांपर्यंत वाढले आहे. यामुळे प्रत्यक्ष ऑक्टोबर महिन्यात उष्णतेची लाट अधिकच त्रासदायक ठरणार असल्याचे स्पष्ट संकेत मिळत आहेत.
यंदाच्या पावसाने प्रारंभापासूनच लहरीपणा दाखवत असहकार पुकारल्याने जिल्ह्यात कुठेही सलग असा मुसळधार पाऊस झाला नाही. ऐन पावसाळ्याच्या दिवसांत ऊन-पावसाचा खेळ सुरू राहिल्याने हवेतील गारवा पूर्णपणे हरवला आणि उन्हाची तीव्रता वाढत गेली. गतवर्षी मे महिन्याच्या उत्तरार्धात झालेल्या पावसाने दिलासा दिला होता आणि ऑगस्टपासून पुढे १४ ऑक्टोबरपर्यंत पावसाने सातत्य राखल्याने सरासरीच्या ९० टक्के पाऊस पडून पाणीटंचाईची तीव्रता कमी झाली होती. मात्र यंदा परिस्थिती पूर्णपणे उलट असून पावसाच्या मोठ्या खंडामुळे शेती करपण्याचा गंभीर धोका निर्माण झाला आहे. दरवर्षी सुरुवातीच्या पावसाळ्यातच पाच ते सहा वेळा दुथडी भरून वाहणाऱ्या जिल्ह्यातील प्रमुख नद्यांची पात्रे यंदा केवळ जगबुडी नदीचा अपवाद वगळता नियंत्रणातच राहिली. आता सप्टेंबरमध्येच कडक ऊन पडू लागल्याने नद्या आणि धरणांमधील पाणीसाठ्यात झपाट्याने घट होऊ लागली असून, येत्या काळात तीव्र पाणीटंचाईचे संकट ओढवण्याची भीती व्यक्त होत आहे.
