रत्नागिरी: जागतिक अन्न दिनाचे औचित्य साधून तसेच महाराष्ट्र शासनाच्या सेवा संकल्प अभियानांतर्गत येथील डॉ. बाळासाहेब सावंत कोकण कृषी विद्यापीठाच्या मत्स्य अभियांत्रिकी तंत्रनिकेतन, शिरगाव येथे मत्स्य पदार्थ पाककला स्पर्धेचे दिमाखदार आयोजन करण्यात आले. ‘आजचा नवोन्मेष, उद्याचे सुदृढ पोषण’ या मध्यवर्ती संकल्पनेवर आधारित पार पडलेल्या या स्पर्धेला जिल्ह्यातील खवय्ये आणि गृहिणींचा उत्स्फूर्त प्रतिसाद लाभला. सागरी जीवशास्त्रीय संशोधन केंद्र झाडगाव, रोटरी क्लब ऑफ रत्नागिरी मिडटाउन आणि इनरव्हील क्लब ऑफ रत्नागिरी यांच्या संयुक्त विद्यमाने राबविण्यात आलेल्या या उपक्रमात १९ स्पर्धकांनी तब्बल ३३ विविध प्रकारच्या वैशिष्ट्यपूर्ण मत्स्यपदार्थांचे सादरीकरण केले.
कार्यक्रमाच्या अध्यक्षस्थानावरून बोलताना डॉ. केतनकुमार चौधरी यांनी मत्स्य पदार्थांचे मानवी आहारातील पोषणमूल्य आणि स्वयंरोजगार निर्मितीतील अफाट वाव यावर प्रकाश टाकला. मत्स्य उत्पादनांवर प्रक्रिया करून तयार करण्यात येणाऱ्या मूल्यवर्धित उत्पादनांमुळे ग्रामीण व किनारी भागात नव्या रोजगाराच्या संधी निर्माण होऊ शकतात, तसेच समाजातील कुपोषण दूर करून निरोगी जीवनशैलीसाठी मत्स्याहार अत्यंत प्रभावी ठरतो, असे त्यांनी नमूद केले. कार्यक्रमाचे प्रास्ताविक करताना सागरी जीवशास्त्रीय संशोधन केंद्राचे प्राध्यापक डॉ. आसिफ उमर पागारकर यांनी मानवी आरोग्यासाठी माशांचे अनन्यसाधारण महत्त्व विशद करून संतुलित आहारातील त्यांच्या भूमिकेवर सविस्तर मार्गदर्शन केले. या प्रसंगी इनरव्हील क्लबच्या अध्यक्षा सौ. सुवर्णा चौधरी, रोटरी क्लब मिडटाउनचे अध्यक्ष डॉ. संदीप करे, सचिव सीताराम सावंत तसेच राजेंद्र कदम यांची प्रमुख उपस्थिती होती.
मत्स्य व सागरी खाद्यपदार्थांचे पौष्टिक महत्त्व जनमानसात रुजविणे आणि पाककलेतील नाविन्यतेला व्यासपीठ मिळवून देण्याच्या उद्देशाने आयोजित या स्पर्धेचे परीक्षण हॉटेल मॅनेजमेंट क्षेत्रातील तज्ज्ञ श्रीमती मेघना विनायक शेलार, गद्रे मरीनचे शेफ अनिकेत बडबे आणि डॉ. आसिफ पागारकर यांनी चव, दर्जा, पोषण आणि सादरीकरण या निकषांवर केले. अत्यंत चुरशीच्या ठरलेल्या या स्पर्धेत उत्कृष्ट सादरीकरण करत श्रीमती दीपिका दिनेश कुबल यांनी प्रथम क्रमांक पटकावला, तर श्रीमती विशाखा विवेक पिलणकर यांनी द्वितीय आणि श्रीमती मीनाक्षी आतिश कीर यांनी तृतीय क्रमांक संपादन केला. याशिवाय अनिरुद्ध शारंगंधर, वैदेही चव्हाण, जान्हवी साखरकर आणि वैष्णवी यादव यांना उत्तेजनार्थ पारितोषिके देऊन गौरविण्यात आले. विजेत्यांना अनुक्रमे तीन हजार, दोन हजार, एक हजार व उत्तेजनार्थ प्रत्येकी पाचशे रुपये रोख आणि सन्मानचिन्ह देऊन सन्मानित करण्यात आले. या पारितोषिकांचे प्रायोजकत्व रोटरी क्लब मिडटाउनने भूषविले.
सदर उपक्रमासाठी कुलगुरू डॉ. संजय भावे, विस्तार शिक्षण संचालक डॉ. संजयकुमार तोरणे, संशोधन संचालक डॉ. प्रशांत शहारे, शिक्षण संचालक डॉ. सतीश नारखेडे आणि सहयोगी अधिष्ठाता डॉ. वरवडेकर यांचे मोलाचे मार्गदर्शन लाभले. कार्यक्रम यशस्वी करण्यासाठी तंत्रनिकेतन व संशोधन केंद्रातील अधिकारी, कर्मचारी व विद्यार्थ्यांनी विशेष परिश्रम घेतले. मत्स्य उत्पादनांचे मूल्यवर्धन आणि त्यातून स्वावलंबनाचा मार्ग कसा सुकर होऊ शकतो, याचा उत्तम वस्तुपाठ या स्पर्धेच्या माध्यमातून समोर आला.
