‘Bappa.org’वरून रत्नागिरीच्या गणेशोत्सव परंपरा जगासमोर मांडा

जिल्हाधिकारी मनुज जिंदल यांचे जिल्हावासीयांना आवाहन; घरगुती व सार्वजनिक गणेशोत्सवाचे डिजिटल दस्तऐवजीकरण करण्याची संधी

रत्नागिरी : महाराष्ट्राच्या समृद्ध सांस्कृतिक परंपरेचा अविभाज्य भाग असलेल्या गणेशोत्सवाला ‘राज्य महोत्सव’ म्हणून घोषित करण्यात आले आहे. या उत्सवाच्या वैशिष्ट्यपूर्ण परंपरांना राष्ट्रीय आणि आंतरराष्ट्रीय स्तरावर ओळख मिळवून देण्याच्या उद्देशाने ‘Bappa.org’ हा अधिकृत डिजिटल मंच सुरू करण्यात आला आहे. या माध्यमातून महाराष्ट्रातील गणेशोत्सवाच्या विविध परंपरा, श्रद्धा आणि सांस्कृतिक वैशिष्ट्यांचे डिजिटल स्वरूपात कायमस्वरूपी दस्तऐवजीकरण करण्यात येणार आहे. रत्नागिरी जिल्ह्यातील नागरिकांनीही या उपक्रमात मोठ्या संख्येने सहभागी होऊन आपल्या बाप्पाची वैशिष्ट्यपूर्ण कथा जगासमोर आणावी, असे आवाहन जिल्हाधिकारी मनुज जिंदल यांनी केले.

‘Bappa.org’ या डिजिटल मंचावर जिल्हावासीयांना आपल्या घरातील तसेच सार्वजनिक गणेश मंडळांच्या गणेशोत्सवाशी संबंधित आठवणी, अनुभव, परंपरा आणि सांस्कृतिक वैशिष्ट्ये नोंदविण्याची संधी उपलब्ध करून देण्यात आली आहे. घरातील किंवा सार्वजनिक गणेश मंडळाची पारंपरिक आरती रेकॉर्ड करून अपलोड करण्यासोबतच गणरायाची छायाचित्रे, गणेशोत्सवाशी संबंधित खास पाककृती, प्रथा-परंपरा आणि उत्सवाच्या विविध पैलूंची माहितीही या माध्यमातून जगासमोर मांडता येणार आहे.

रत्नागिरी जिल्ह्यातील सार्वजनिक गणेश मंडळे, घरगुती गणेशोत्सव तसेच पिढ्यानपिढ्या जपल्या गेलेल्या वैशिष्ट्यपूर्ण परंपरांची या उपक्रमांतर्गत नोंद केली जाणार आहे. यामध्ये स्थानिक श्रद्धा, प्रथा, सांस्कृतिक वैशिष्ट्ये, आरतीच्या परंपरा, नैवेद्य आणि गणेशोत्सवाशी निगडित विविध लोकपरंपरांचाही समावेश होऊ शकतो. त्यामुळे कोकणच्या मातीत रुजलेल्या गणेशोत्सवाच्या अनोख्या परंपरांना व्यापक व्यासपीठ मिळण्याची संधी निर्माण झाली आहे.

रत्नागिरी जिल्ह्याच्या सांस्कृतिक वैभवाची ओळख निर्माण करणाऱ्या या परंपरा पुढील पिढ्यांसाठी जतन व्हाव्यात आणि त्यांना राष्ट्रीय तसेच आंतरराष्ट्रीय स्तरावर ओळख मिळावी, यासाठी नागरिकांचा सहभाग महत्त्वाचा असल्याचे जिल्हाधिकारी जिंदल यांनी सांगितले. “जिल्हावासीयांनी या उपक्रमात मोठ्या संख्येने सहभागी होऊन आपल्या घरातील, गावातील आणि परिसरातील गणेशोत्सवाच्या वैशिष्ट्यपूर्ण परंपरा जगासमोर आणाव्यात. आपल्या बाप्पाची कथा, परंपरा आणि सांस्कृतिक वारसा डिजिटल माध्यमातून जतन करण्यासाठी प्रत्येकाने पुढाकार घ्यावा,” असे आवाहन त्यांनी केले.