राजापूर : तालुक्यातील ओणी-कोंडीवळे येथील गोतावडेवाडी परिसरात बंद घराच्या मागील दरवाजाची कडी तोडून घरात प्रवेश करत अज्ञात चोरट्याने सोन्या-चांदीचे दागिने लंपास केल्याची घटना उघडकीस आली आहे. या घरफोडीत तब्बल १ लाख ८ हजार ७६५ रुपयांचे दागिने चोरीला गेले असून, या प्रकरणी राजापूर पोलीस ठाण्यात अज्ञात व्यक्तीविरुद्ध गुन्हा दाखल करण्यात आला आहे.
पोलिसांकडून मिळालेल्या माहितीनुसार, शामसुंदर गजानन शेट्ये (वय ३४, रा. ओणी-कोंडीवळे, गोतावडेवाडी, ता. राजापूर) यांच्या राहत्या घरी २० ऑक्टोबर २०२६ रोजी सायंकाळी ५.४५ ते रात्री ९.४५ वाजण्याच्या दरम्यान ही चोरी झाली. घरात कोणीही नसल्याची संधी साधून अज्ञात चोरट्याने घराच्या मागील दरवाजाची कडी तोडली आणि दरवाजा तोडून घरात प्रवेश केला. त्यानंतर बेडरूममधील कपाटात ठेवलेले सोन्या-चांदीचे दागिने चोरून नेले.
या चोरीमध्ये ८७ हजार ७६५ रुपये किमतीचे १२.८५ ग्रॅम वजनाचे सोन्याचे दागिने आणि २१ हजार रुपये किमतीचे चांदीचे दागिने, असा एकूण १ लाख ८ हजार ७६५ रुपयांचा मुद्देमाल चोरीला गेला आहे. या प्रकरणी २२ ऑक्टोबर २०२६ रोजी दुपारी २.२५ वाजता राजापूर पोलीस ठाण्यात भारतीय न्याय संहितेच्या कलम ३०५(अ), ३३१(३) आणि ३३१(४) अन्वये गुन्हा क्रमांक २७०/२०२६ दाखल करण्यात आला आहे. घरफोडी करणाऱ्या अज्ञात चोरट्याचा शोध घेण्याचे आव्हान पोलिसांसमोर असून, या प्रकरणाचा पुढील तपास राजापूर पोलीस करत आहेत.
