संगमेश्वर : महाड तालुक्यातील एका १९ वर्षीय तरुणीच्या पोटात नकळत गिळली गेलेली धारदार टोकदार पिन डेरवण येथील बी. के. एल. वालावलकर रुग्णालयात एंडोस्कोपीच्या साहाय्याने यशस्वीरीत्या बाहेर काढण्यात डॉक्टरांना यश आले आहे. प्रसिद्ध गॅस्ट्रोलॉजिस्ट डॉ. आनंद जोशी व त्यांच्या वैद्यकीय पथकाने कोणतीही मोठी शस्त्रक्रिया न करता ही अत्यंत गुंतागुंतीची प्रक्रिया अत्यंत कौशल्याने पार पाडल्यामुळे त्या तरुणीचा जीव वाचला असून तिचे कुटुंबीय भयमुक्त झाले आहेत.
मिळालेल्या माहितीनुसार, महाड परिसरातील एका ग्रामीण भागात राहणाऱ्या या तरुणीने खेळता खेळता एक टोकदार पिन तोंडात धरली होती, मात्र दुर्दैवाने ती अचानक घशातून थेट जठरात गेली. घाबरलेल्या तरुणीने तात्काळ याची कल्पना पालकांना दिली असता त्यांनी तिला तातडीने स्थानिक शासकीय रुग्णालयात नेले. तेथील क्ष-किरण (एक्स-रे) तपासणीत ती टोकदार पिन तरुणीच्या जठरात अडकल्याचे स्पष्ट झाले. तेथील डॉक्टरांनी पुढील उपचारांसाठी मुंबई अथवा पुण्यातील मोठ्या रुग्णालयात जाण्याचा सल्ला दिला, मात्र आर्थिक परिस्थिती बेताची असल्याने तो खर्च परवडणारा नव्हता. अखेर नातेवाइकांनी तातडीने डेरवण येथील बी. के. एल. वालावलकर रुग्णालय गाठून वैद्यकीय मदत मागितली.
रुग्णालयातील तज्ज्ञ गॅस्ट्रोलॉजिस्ट डॉ. आनंद जोशी यांनी तरुणीची तपासणी करून कोणतीही मोठी चिरफाड न करता एंडोस्कोपी तंत्रज्ञानाचा वापर करून पिन बाहेर काढण्याचा धाडसी निर्णय घेतला. पोटातील अथवा अन्ननलिकेतील टोकदार वस्तूमुळे अंतर्गत अवयवांना छिद्र पडून अंतर्गत रक्तस्राव होण्याचा मोठा धोका असतो, त्यामुळे ही प्रक्रिया अत्यंत नाजूक व जोखमीची होती. डॉ. जोशी यांनी अत्यंत कौशल्याने आणि काळजीपूर्वक एंडोस्कोपीच्या माध्यमातून ती टोकदार पिन सुखरूप बाहेर काढली. वालावलकर रुग्णालयात अत्यंत अल्प दरात आणि तातडीने मिळालेल्या या दर्जेदार उपचारामुळे तरुणीचे प्राण वाचले असून तिच्यावर होणारी मोठी व खर्चिक शस्त्रक्रिया टळली आहे. या यशस्वी उपचाराबद्दल रुग्णाच्या नातेवाइकांनी डॉ. आनंद जोशी आणि रुग्णालयातील वैद्यकीय पथकाचे मनापासून आभार मानले आहेत.
