देवरूख: रत्नागिरी येथे संपन्न झालेल्या जिल्हास्तरीय बुद्धिबळ स्पर्धेत पी. एस. बने इंटरनॅशनल स्कूल (साडवली) चा हुशार खेळाडू आरुष राजीव चव्हाण याने १७ वर्षांखालील वयोगटात उल्लेखनीय कामगिरी नोंदवत थेट विभागीय बुद्धिबळ स्पर्धेत धडक मारली आहे. विशेष म्हणजे, संपूर्ण संगमेश्वर तालुक्यातून या वयोगटात विभागीय फेरीसाठी पात्र ठरणारा आरुष हा एकमेव विद्यार्थी ठरल्याने तालुक्याच्या क्रीडा क्षेत्रात त्याचे विशेष कौतुक होत आहे.
जिल्ह्यातील नऊ तालुक्यांतील निवडक विद्यार्थ्यांच्या सहभागाने रंगलेल्या या स्पर्धेत आरुषने संगमेश्वर तालुक्याचे प्रतिनिधित्व करताना आपल्या चाणाक्ष डावपेचांनी संपूर्ण स्पर्धेवर छाप पाडली. आरुषच्या या यशाचे सर्वांत मोठे वैशिष्ट्य म्हणजे त्याने कोणत्याही बुद्धिबळ वर्गात किंवा व्यावसायिक प्रशिक्षण संस्थेत न जाता केवळ स्व-अभ्यास व ऑनलाईन बुद्धिबळाच्या साहाय्याने ही पूर्वतयारी केली होती. कोणतीही बाह्य शिकवणी नसताना केवळ स्वतःची दुर्दम्य जिद्द, सातत्यपूर्ण चिकाटी आणि खेळावरील निस्सीम आवडीच्या जोरावर त्याने मिळवलेले हे यश थक्क करणारे ठरले आहे.
याआधी तालुकास्तरीय बुद्धिबळ स्पर्धेत उत्कृष्ट खेळ दाखवून त्याने संगमेश्वर तालुक्याच्या संघात स्थान मिळवले होते. त्यानंतर जिल्हास्तरावरही विजयी घोडदौड कायम राखत त्याने आता विभागीय बुद्धिबळ स्पर्धेत रत्नागिरी जिल्ह्याचे प्रतिनिधित्व करण्याचा बहुमान पटकावला आहे. आरुषच्या या दैदिप्यमान कामगिरीमुळे पी. एस. बने इंटरनॅशनल स्कूलच्या शिरपेचात आणखी एक मानाचा तुरा रोवला गेला असून, शाळेच्या वतीने त्याचे जाहीर अभिनंदन करण्यात आले आहे तसेच आगामी विभागीय स्पर्धेसाठी त्याला मनःपूर्वक शुभेच्छा देण्यात आल्या आहेत.
