रत्नागिरी: शहरातील जेलरोड नाका परिसरात स्थानिक गुन्हे अन्वेषण शाखेने केलेल्या धडक कारवाईत बेकायदेशीर विक्रीसाठी ब्राऊन हेरॉईन (टर्की) हा अंमली पदार्थ बाळगणाऱ्या एका २१ वर्षीय तरुणाला रंगेहात पकडण्यात आले आहे. नुफेरअली खालीद तांडेल (वय २१, रा. गाझी मोहल्ला, वरचा वाडा, साखरी नाटे, ता. राजापूर, जि. रत्नागिरी) असे ताब्यात घेतलेल्या संशयित आरोपीचे नाव आहे. पोलिसांनी या कारवाईत अंमली पदार्थासह दुचाकी व मोबाईल असा एकूण १ लाख ६५ हजार रुपयांचा मुद्देमाल जप्त केला आहे.
जिल्ह्यात पोलिसांच्या वतीने राबवण्यात येत असलेल्या विशेष ‘ऑल आऊट ऑपरेशन’दरम्यान स्थानिक गुन्हे शाखेचे पथक जेलरोड नाका परिसरात नाकाबंदी आणि तपासणी करत होते. यावेळी रस्त्याच्या कडेला संशयास्पदरीत्या थांबलेल्या नुफेरअली तांडेल याची झडती घेतली असता त्याच्याकडे विक्रीच्या उद्देशाने ठेवलेला उग्र वासाचा ब्राऊन हेरॉईन सदृश अंमली पदार्थ आढळून आला. पोलिसांनी केलेल्या तपासणीत प्लास्टिक पिशवीसह ६ ग्रॅम आणि निव्वळ ४ ग्रॅम वजनाचा हा साठा मिळून आला. आरोपीने या अंमली पदार्थाच्या प्रत्येकी ५०० रुपये किमतीच्या एकूण १२० लहान पुढ्या कागदात बांधून तयार ठेवल्या होत्या. या पदार्थाची बाजारातील अंदाजे किंमत ६० हजार रुपये इतकी आहे.
या कारवाईदरम्यान पोलिसांनी ६० हजार रुपयांचा अंमली पदार्थ, पुढ्या बांधण्यासाठी वापरण्यात आलेले कागदाचे तुकडे आणि रिकाम्या पिशव्या, ५ हजार रुपये किमतीचा वापरता रिअलमी नार्झो ८० लाईट मोबाईल हँडसेट तसेच गुन्ह्यात वापरलेली १ लाख रुपये किमतीची सुझुकी ॲक्सेस पांढऱ्या रंगाची दुचाकी (क्रमांक एमएच ०८ बीवाय २८०५) असा एकूण १ लाख ६५ हजार रुपयांचा ऐवज ताब्यात घेतला आहे.
स्थानिक गुन्हे अन्वेषण शाखेचे पोलीस हेडकॉन्स्टेबल गणेश राजेंद्र सावंत (बकल नं. ३०६) यांनी दिलेल्या फिर्यादीवरून रत्नागिरी शहर पोलीस ठाण्यात आरोपीविरुद्ध गुन्हा रजिस्टर क्रमांक ४६४/२०२६ अन्वये एनडीपीएस ॲक्ट १९८५ च्या कलम ८(क) आणि २१(अ) अंतर्गत गुन्हा दाखल करण्यात आला आहे. एवढ्या मोठ्या प्रमाणावर हा अंमली पदार्थ कुठून आणला आणि तो शहरात कोणाला विकला जाणार होता, या रॅकेटचा पुढील तपास रत्नागिरी शहर पोलीस करत आहेत.
