मुंबई : जागतिक तापमानवाढ आणि अल-निनोच्या प्रभावामुळे यंदा समाधानकारक पाऊस न पडल्याने राज्यातील अनेक भागांत दुष्काळी परिस्थिती निर्माण झाली असून नैऋत्य मोसमी पाऊसही माघारी परतला आहे. मात्र, या कोरड्या हवामानात लवकरच मोठा बदल होणार असून राज्यात पुन्हा एकदा पावसाची दमदार हजेरी लागणार असल्याचे संकेत मिळाले आहेत. हवामान अभ्यासक पंजाबराव डख यांनी दसऱ्यानंतर राज्यात पावसाचे पुनरागमन होईल अशी शक्यता वर्तवली असून, प्रादेशिक हवामान विभागानेही दसऱ्यापूर्वीच विविध जिल्ह्यांमध्ये विजांच्या कडकडाटासह वादळी पावसाचा अंदाज व्यक्त केला आहे.
हवामान तज्ज्ञ पंजाबराव डख यांच्या अंदाजानुसार, १७ ऑक्टोबरपर्यंत संपूर्ण महाराष्ट्रात हवामान प्रामुख्याने कोरडे राहील, मात्र १८ ऑक्टोबरपासून वातावरणात लक्षणीय बदल जाणवू लागतील. त्यानंतर दसऱ्यानंतर म्हणजेच २० ते २५ ऑक्टोबर या कालावधीत परतीचा पाऊस सक्रिय होईल, ज्याचा मोठा लाभ शेतकऱ्यांना रब्बी हंगामातील पेरणीसाठी होणार आहे. हा पाऊस सर्वदूर नसला तरी काही भागांत रिमझिम तर काही ठिकाणी जोरदार स्वरूपाचा राहील. जोपर्यंत वातावरणात दाट धुके पडत नाही तोपर्यंत राज्यातून पाऊस पूर्णपणे संपलेला नसतो, असे स्पष्ट करत त्यांनी कोल्हापूर, सांगली, सातारा, पुणे, अहिल्यानगर, धाराशिव, लातूर, सोलापूर, बीड, परभणी, नांदेड, हिंगोली, यवतमाळ, वाशीम, जालना आणि छत्रपती संभाजीनगर या पट्ट्यात पावसाचा जोर अधिक राहण्याचा अंदाज वर्तवला आहे, तर उत्तर महाराष्ट्र आणि विदर्भातील काही भागांतही हलक्या सरी कोसळण्याची शक्यता व्यक्त केली आहे.
दुसऱ्या बाजूला, भारतीय हवामान विभागानेही आगामी काही दिवसांत राज्यातील अनेक जिल्ह्यांत वादळी पावसाची शक्यता वर्तवली आहे. १५ ऑक्टोबर रोजी कोल्हापूर जिल्हा आणि घाटमाथ्यावर ताशी ३० ते ४० किलोमीटर वेगाने वाहणाऱ्या वाऱ्यासह मध्यम पावसाचा अंदाज आहे. त्यानंतर १६ ऑक्टोबरला सिंधुदुर्ग, पुणे, सातारा, सांगली, सोलापूर, कोल्हापूर आणि धाराशिव या सात जिल्ह्यांमध्ये, तर १७ ऑक्टोबरला कोकणातील रायगड, रत्नागिरी आणि सिंधुदुर्गसह पश्चिम महाराष्ट्र आणि मराठवाड्यातील लातूर, नांदेड, धाराशिव अशा तब्बल ११ जिल्ह्यांमध्ये पावसाचा इशारा देण्यात आला आहे. मात्र, पावसाच्या या पुनरागमनापूर्वी कोकण आणि मुंबई परिसराला तीव्र उन्हाच्या झळा सोसाव्या लागणार असून, हवामान विभागाने १४ व १५ ऑक्टोबरसाठी मुंबई, ठाणे, रायगड आणि रत्नागिरी जिल्ह्यांना उष्णतेच्या लाटेचा ‘यलो अलर्ट’ जारी केला आहे.
