नवी दिल्ली: केंद्रीय मुख्य निवडणूक आयुक्त ज्ञानेश कुमार यांच्या राजीनाम्याची मागणी आणि विशेष सखोल मतदार यादी पुनरीक्षण (एसआयआर) प्रक्रियेतील कथित गैरव्यवहारांवरून देशातील राजकीय वातावरण पेटले असतानाच विरोधी पक्षनेते राहुल गांधी यांनी निर्णायक लढ्याची घोषणा केली आहे. दिल्ली आणि मुंबईत आंदोलकांवर झालेल्या पोलिसी कारवाईच्या निषेधार्थ इंडिया आघाडीने आक्रमक पवित्रा घेतला असून, संविधानाच्या आणि लोकशाहीच्या रक्षणासाठी आज, सोमवार १२ ऑक्टोबर रोजी देशभरातील नागरिक थेट सर्वोच्च न्यायालयावर धडक मोर्चा काढणार आहेत. या मोर्चानंतर भारताच्या सरन्यायाधीशांना प्रत्यक्ष निवेदन सादर करून मतदार यादीतील कथित अनियमितता, मते चोरीला जाण्याचे प्रकार तातडीने रोखणे, वादग्रस्त एसआयआर प्रक्रिया रद्द करणे आणि मुख्य निवडणूक आयुक्त ज्ञानेश कुमार यांचा तत्काळ राजीनामा घेणे या मागण्या मांडल्या जाणार आहेत.
सोशल मीडियावरील पोस्ट आणि व्हिडिओ संदेशाद्वारे ही भूमिका स्पष्ट करताना राहुल गांधी यांनी सांगितले की, दिल्लीत शांततापूर्ण मार्गाने निदर्शने करणाऱ्या तरुणांवर पोलीस आणि सत्ताधाऱ्यांच्या गुंडांनी अमानुष मारहाण केली. हा प्रकार संविधानाची मूल्ये पायदळी तुडवणारा असून, दडपशाही करणाऱ्यांना सडेतोड उत्तर देण्यासाठी आज हा मोर्चा निघत आहे. नरेंद्र मोदी, अमित शहा, अजित डोवाल आणि मोहन भागवत हे देशाचा आवाज कदापि दाबू शकत नाहीत, असे सांगत त्यांनी कार्यकर्त्यांना आणि सामान्य जनतेला “घाबरू नका” असा धीर दिला. पक्ष, जात, लिंग, समुदाय आणि राज्यांच्या सीमांच्या पलीकडे जाऊन सर्व विरोधी पक्ष, तरुण पिढी, नागरी समाज संघटना आणि संविधानावर निष्ठा असणाऱ्या प्रत्येक नागरिकाने प्रेम, बंधुभाव आणि देशभक्तीच्या भावनेने आज एकत्र येऊन सर्वोच्च न्यायालयाच्या दिशेने कूच करावे, असे आवाहन त्यांनी केले. या ऐतिहासिक मोर्चामुळे निवडणूक आयोगाची कार्यपद्धती आणि मतदार याद्यांच्या पारदर्शकतेचा प्रश्न पुन्हा एकदा देशाच्या राजकीय पटलावर ऐरणीवर आला असून संपूर्ण देशाचे लक्ष आज सर्वोच्च न्यायालयाकडील घडामोडींकडे लागले आहे.
