आशियाई क्रीडा स्पर्धा २०२६: भारतीय महिला हॉकी संघाने इंडोनेशियाचा १७-१ ने उडवला धुव्वा

दिल्ली : आशियाई क्रीडा स्पर्धा २०२६ मध्ये भारतीय महिला हॉकी संघाने आपली विजयी मालिका कायम राखली आहे. भारताने ‘पूल बी’ मधील दुसऱ्या सामन्यात इंडोनेशियाचा १७-१ असा दणदणीत पराभव केला.

या विजयात दीपिका सेहरावत आणि रुतुजा पिसाळ या विजयाच्या शिल्पकार ठरल्या.

याआधी उझबेकिस्तानविरुद्धच्या १९-० अशा विजयात विक्रमी आठ गोल करणाऱ्या दीपिकाने या सामन्यातही रुतुजाच्या साथीने आणखी तीन गोल केले. तसेच, सुनीलिता टोप्पो, कर्णधार सलिमा टेटे आणि साक्षी राणा यांनीही गोल नोंदवत महत्त्वपूर्ण योगदान दिले.

इंडोनेशियाविरुद्धच्या या सामन्यात, विक्रमी कामगिरी करणाऱ्या दीपिकाने आठव्या मिनिटाला पेनल्टी कॉर्नरचे रूपांतर गोलमध्ये करत संघाच्या गोल-वर्षावाची सुरुवात केली. तिने यासाठी एक उत्कृष्ट ‘ड्रॅग-फ्लिक’ लगावला. पुढील सात मिनिटांत गोलचा पाऊस पडला. सुनीलिता टोप्पो (११ वे मिनिट), लालरेम्सियामी (१३ व्या मिनिटाला पेनल्टीद्वारे गोल) आणि रुतुजा पिसाळ (१५ वे मिनिट) यांनी गोल करत पहिल्या सत्राच्या अखेरीस संघाला ४-० अशी आघाडी मिळवून दिली. लालरेम्सियामीचा गोल नवनीतच्या पेनल्टी कॉर्नरवरील फटक्यानंतर आला. नवनीतचा फटका गोलकीपरने अडवला होता. पण ‘रिबाउंड’वर लालरेम्सियामीने गोल करण्यात यश मिळवले.

रुतुजाचा पहिला गोलही ‘रिबाउंड’वर जवळून करण्यात आला होता. दीपिकाचा फटका गोलकीपरने अडवल्यानंतर तिला ही संधी मिळाली होती.

दुसऱ्या सत्राची सुरुवात लालरेम्सियामीने धमाकेदार पद्धतीने केली. गोलकीपरने अडवलेला एक लांब आणि जमिनीलगतचा पास भारतीय फॉरवर्ड खेळाडूंनी ताब्यात घेतला आणि चेंडू मिळताच तिने ‘रिव्हर्स हिट’ मारून १६ व्या मिनिटाला आपला दिवसातील दुसरा गोल नोंदवला.

रुतुजाने २० व्या मिनिटाला आपला दुसरा गोल केला. नेहा चेंडू घेऊन ‘सर्कल’मध्ये आली आणि तिने रुतुजाला पास दिलारु. तुजाने कोणतीही चूक न करता फटका मारला आणि भारताची आघाडी ६-० ने वाढवली. गोलचा हा सिलसिला पुढेही चालू राहिला. साक्षी राणाने २५ व्या मिनिटाला गोल नोंदवला, तर दीपिका (२८ वे मिनिट) आणि सुनीलिता (३० वे मिनिट) यांनी पेनल्टी कॉर्नरचे यशस्वीरीत्या गोलमध्ये रूपांतर केले. मध्यंतरापर्यंत भारताने इंडोनेशियावर पूर्ण वर्चस्व गाजवत ९-० अशी आघाडी घेतली होती. मध्यंतरापर्यंत, भारताकडे ५५ टक्के चेंडूवरील ताबा होता आणि त्यांना नऊ पेनल्टी कॉर्नर्स मिळाले होते, तर इंडोनेशियाला केवळ दोनच मिळाले होते.

मध्यंतरानंतर, कर्णधार सलिमा टेटे (३४ व्या मिनिटाला), नवनीत (३५ व्या मिनिटाला), इशिका (३६ व्या मिनिटाला), ऋतुजा (३९ व्या मिनिटाला) आणि दीपिका (४० व्या मिनिटाला) यांनी आक्रमक खेळ सुरूच ठेवला आणि गोलचा फरक १४-१ असा केला. दरम्यान, इंडोनेशियाच्या इनिस आदियिताने ३२ व्या मिनिटाला एक गोल केला होता.त्यानंतर नवनीत (५६ व्या आणि ५७ व्या मिनिटाला) आणि साक्षी राणा (५७ व्या मिनिटाला) यांनी भारतासाठी आणखी गोल केले.